Press "Enter" to skip to content

Pakhang shnong ka DC Ri Bhoi naduh Byrnihat haduh Rani

Ban tehlakam ia ka COVID-19

Nongpoh Jylliew 29: Kum shi bynta ban dang shim ki lad jingiada na ka bynta ban ïa khun pyrshah ïa ka jingwan lynshop ka khlam COVID-19 ha ka District bad ka jylla hi baroh kawei bad ruh baroh ki paidbah ka Ri Bhoi kin bud ryntih ïa ka jingbthah ka sorkar ban shim kita ki lad jingiada, ka District Magistrate, Ri Bhoi District, Nongpoh kumba la pynkup bor ha ka section 144 CrPC bad ruh katkum ka Regulation 3 ka Meghalaya Epidemic Diseases, COVID-19 Regulations, 2020 bad ki kyndon No.5 (i) katkum ka hukum ba la pynjari da ka sorkar India lyngba ka Ministry of Home Affairs ka la pynjari da ki kyndon ban tehla kam ha kane ka jingpakhang shnong (Lockdown) katkum ki jaka ba la khang ha Ri Bhoi District.
Kane ka kyndon aiñ ba la pynjari da ka Deputy Commissioner ka Ri Bhoi kan sdang naduh ka 6:00 mynstep naduh ka 30th tarik u Jylliew, 20202 haduh ka 6:00 mynstep jong ka 13 tarik u Naitung , 2020.
Kine ki shnong ba la pakhang shnong da ka Deputy Commissioner ka Ri Bhoi ki kyn thup ïa ki shnong ha ka thaiñ Byrnihat, Jorobat haduh Baridua, Am-patama, Umshru Sukhoi-nijira, Iewmawroh, Bakhlapara, Hawla, Jimbrigeon, Lyng-khung, Patgaon, Umsen, Jyr-mang, Bernongsai Nongkhlaw, Ber nongsai Nongspung, Umsaliang, Gunapati, Mairapur, Nongkyllang, Rani Jirang, Umshalani, Ranibari, Bala-khawa, New Balakhawa, Bilpara, Halher, Akhoinijira, Garobha-nga bad ka shnong Ulubari ba hap ha Ri Bhoi District.
Kane ka jingpakhang shnong noh ka Deputy Commissioner ïa kitei ki Shnong ha ka thaiñ Ri Bhoi, ka dei ka jingbthah sha baroh ki nongshong shnong ba ki hap ban shim kita ki lad jingïada hadien ba la wan lynshop ka khlam COVID-19 ba kum ki paidbah ki hap ban shim lypa ïa ki lad jingiada.
Kane ka hukum ne ka kyndon aiñ ka la khang pyrshah ban lum lang shi jaka palat 5 ngut ha kajuh ka jaka paidbah, ban pynjngai iwei ia iwei kumba 6 phut ka jingjngai, ban iaid ki kali paidbah, ban plie ki iew ki hat, ban biah klumar ha ki jaka paidbah bad la shah ruh ban shim bynta tang kumba 20 ngut ha ka por ba tep briew la don ka jingiarap briew.
La pynban ruh ba ki dukan ba la ithuh da ka bor District kin plie beit ha kitei ki sngi bad ki hap pat ban bud katkum ba la buh da ka bor District ban shakri na ka bynta ki paidbah kiba wan ban theid marbam mardih.
La ai bor ruh ïa ki Rangbah shnong ba kin pyniaid beit pyniaid ryntih ïa ki dukan ha ki shnong ki thaw ba la peit ne kmih da ki Rangbah Shnong bad ki hap ruh ban pynthikna ban bud ryntih ïa ki kyndon ba la buh da ka sorkar ban shim ki lad jingiada na ka jingpur ka khlam COVID-19.
Shuh shuh, la pyntip ruh ba kane ka pakhang shnong lane ka kyndon ba la pynjari kam treikam pat na ka bynta ki security force, medical team, police and armed force, fire and emergency services, wholesale bad pharmacies, MeECL bad power grid, food and civil supply department, FCI, PWD, PHE Deptt, A.H and veterinary department, postal service, telecom, bad kiwei kiwei ki tnad treikam ka sorkar ba la ai bor da ka bor District.
Kane ka kyndon ain kan treikam noh mardor bad kan dang treikam ruh katba ym pat pynbna da kumwei pat da ka District Magistrate ka Ri Bhoi.