Press "Enter" to skip to content

Pat long kheiñ shngaiñ ka Meghalaya ïa u COVID -19

Ka jylla Meghalaya kam pat long satia ban khein shngaiñ ïa u khñiang COVID-19 watla utei u khñiang jingpang u la sdang ban nang hiar. Ka jingsyier ïa ka Meghalaya kaba kum ka jylla kam dei bna kheinsting kadei namarba ka jylla Assam mynta ka la nang kiew ha ka jingdon ki briew kiba ïoh ïa utei u virus katba ha kane ka jylla pat na ki 50 ngut kiba ïoh, kiba dang shah sumar mynta ki la don sa tang 7 ngut katba ki 42 ngut kiwei pat ki la koit lut.
Ha kawei ka liang, dei ban ai ka jingïaroh ïa ki bor sorkar kynthup naduh ki doktor, ki nos, ki pulit, ki bor pahara, ki nongtrei ha ki jait kam bapher bapher kiba ïadei bad utei u virus khlem da klet noh ïa ki bor shnong, ki ASHA, Aganwadi bad ki ophisar jong ka sorkar jylla kiba la trei khlem khein shuh miet la bad step naduh ka sngi ba utei u khñiang jingpang u la wan pur sha kane ka jylla.
Ym lah ban len ruh ba ka jinglah jong ka Meghalaya ban ïakhun ïa utei u virus kadei ruh na ka jingïakhun bad ka jingsnohkti lang ki bor shnong met bad mynsiem la ka long ha ki shnong ki thaw, ki quarantine centre kiba don ha ki shnong bad wat ha ka imlang sahlang ruh. Kaba itynnad eh ka long ba ki nongïalam shnong ki khlem ap ïa kata ka 5000 tyngka lane ka 1000 tyngka na ka sorkar ban pyndap ïa kito ki jingdonkam baroh na ka bynta kitei ki samla pule kiba wan ne kylleng ki bynta jong ka Ri India hynrei la shu pynlut beit na ka pla tyngka jong ka shnong.
Ha kawei pat ka liang watla 80 – 90 persen kiba wan na shabar ka jylla ki la dep ïa ka jingset slung ïalade ha ki centre bapher bapher hynrei kaba sngewsih ne kaba i hiar dor ka long ba ym don satia kiban ai burom ïa ki bor shnong na bynta katei ka jingleh bha jong ki. Don bun ki lon giing kiba ym biang satia ki kamra ban set slung hi ïa ki khun ne ki hynmen para jong ki ha ki iing ki sem hynrei ki la shu shaniah beit ha ki jaka sah ba la pynbeit da ka shnong.
Kumban shu kdew hangne, ka jingïaid lynti jong ka Meghalaya ha ka jingïakhun ïa u COVID-19 kadei kaba kyllaiñ bha khamtam eh naduh ka sngi ba u nongpang ba nyngkong u ïoh ïa utei u khñiang jingpang uba ka pyrthei baroh kawei ka pynrit ria bad kyiuh that tang shu ïoh sngew ba u la poi ha ki shnong ki shnong ki thaw. Shipor hadien ba baroh ki bahaiing jong u Dr. Sailo ki la koit lut ka la mih ka jingkyrmen ba utei u khñiang u la jah duh hynrei phewse da khongpong mih iwei hadien iwei pat iba ïoh ïa u.
Hynrei lada phai pat sha kaei kaba long mynta, ka Meghalaya kadei kawei pat ka jylla kaba la paw ha ka jingtbit jong ka ban teh lakam ïa ka jingpur jong utei u khñiang jingpang khlem da don shuh ka jingsyier ne jingtieng watla u la sdang ban pur ha kiwei ki distrik jong ka jylla ruh. Kaba kham sngewtynnad ka long ba haduh mynta ka jingbteng jong ki nongpang ban koit ka la nang bteng bad kane hi kadei ka dak kaba sngewtynnad bad kaba ai jingkyrmen ba ha kawei hi ka sngi kan sa lait noh na ki tyrsim bad ki jingtriem jong utei u khñiang jingpang.
Kumta, ha kane ka jingïakhun ïa une u virus, ka sorkar kadei ban da ai ka jingithuh kaba kyrpang ïa ki bor shnong, ïa ki Aganwadi, ki ASHA kiba la aiti met bad mynsiem khlem kheiñ shuh ïa ka por bad bor ban synran ha kito ki centre ba don kito ki samla ba wan sah, kata ruh khlem kan kano ka jingsiew kyrpang. Haoid ka jingkhublei kadei ban leit lang sha kito ki nongtrei jong ka tnad ka Koit ka Khiah kiba la kham khia khyndiat ka kam na kaba ki ju trei ha kane ka por mynta watla kadei ka kamram jong ki ban pyndep.
Hapdeng kine kiei kiei baroh kiba ka jylla ka kynduh, ka don ka jingkyrmen ba sa tang katto katne por ka jylla kan sa khuid phar khamtam ynda kine ki 7 ngut baroh kiba don mynta ha ki jaka sumar ki la koit lut na katei ka jingpang. Baroh ki nongshong shnong ka jylla ki don ka jingkyrmen ryngkat ka jingpyndem ha ki jingduwai khnang ba kane ka khlam kan jah duh na kane ka jylla ba ieit jongngi bad ba ki paidbah kin lait noh na ka tieng ka smiej bad ka rit mynsiem ha ki iing ki sem jong ki.
Dei ruh ban ai ka jingïaroh ïa ka sorkar jylla hapoh ka jingïalam jong u Conrad K Sangma, ba la shim ïa ka rai ban khang dam shwa ïa kito ki jaka kiba don ha khappud bad ka jylla Assam, kynthup naduh Byrnihat, Jorabad haduh Khanapara na ka daw ka jingkiew kynsan u COVID-19 ha ka jylla ba marjan.