Press "Enter" to skip to content

Pynjari ka Sorkar da ka ‘Lockdown’ ha ki Shnong Khappud ka Guwahati

Yn dang khang ka Interstate Movement haduh ka 15 Naitung

Shillong, Jylliew 29: Ka Sorkar Meghalaya kala pynjari hynne ka sngi nyngkong da ka Lockdown ha ki Shnong ba don ha khappud bad ka Nongbah Guwahati namar ka jingjur ka jingpang COVID-19 ha Assam.
“Ka Sorkar kala rai ba ki jaka ka Meghalaya ba don ha Khappud ka Guwahati kata ka Byrnihat, Jorabat haduh Khanapara kin hap noh hapoh ka Lockdown namar ka jingkiew ka jingpang COVID-19 ha Assam” ong u Conrad Kongkal Sangma, Myntri Rangbah haba pathai ïa kane ka khubor lyngba ka Facebook bad Twitter.
Dang hynnin ka sngi U Blei, haduh 327 ngut kila iabit ïa kane ka jingpang ha Assam bad napdeng kine, haduh 195 ngut ki dei kiba na Nongbah Guwahati. Ka Assam kumba long mynta ka don haduh 7819 ngut ki nongpang ha kaba haduh 2390 ki dei kiba dang pang bad 5088 ngut kila ïoh jingkoit. Haduh 12 ngut ki briew kila ïap ha kane ka Jylla.
U Myntri Rangbah ula pyntip ruh “Ïa ka jingïarung ïamih na kawei ka Jylla sha kawei ruh la bteng ban pyrrkhing shuwa. Ka DC kan sa pynmih ïa ka hukum halor kane”
Haba pynshai ïa kane ka jingpathai khubor u Myntri Rangbah, u Symbud Myntri Rangbah Bah Prestone Tynsong, ula ong ba ym dei ban sngewthuh bakla ïa ka jingkren u Myntri Rangbah namar ka ‘Lockdown’ ka dang treikam ha Jylla baroh kawei hynrei ki don tang ki katto katne ki kam ki ba la pynjynsur.
Kat kum ka jingong u Symbud Myntri Rangbah, ka rai jong ka Sorkar Jylla bala shim hynne ka sngi ka long tang ban phah khang khyrdep noh ïa baroh ki dukan kiba don markhap bad ka Jylla Assam naduh Byrnihat haduh ka Shnong Rani. U Symbud Myntri Rangbah ula pyntip ba ïa kane ka rai la shim ha ka jingïalang bishar kam ba long hynne ka sngi nyngkong. U pyntip“Ka jingkhang khyrdep ïa ki dukan kan sdang naduh lashai ka sngi (30 Jylliew) haduh ka 15 tarik Naitung”.
“Ngi la phah ïa ka jingbthah sha ka Deputy Commissioner. Ngi ieh ha ka jingstad jong ka Deputy Commissioner ban buh ïa ki kyndon pyrrkhing ha kine ki jaka khappud ban pynthikna nyngkong eh ïa ka jingshngaiñ jong ki nong shongshnong ban lait na ka jingiabit ïa u khniang khamtam ba ka Assam kala pynjari ïa ka Lockdown ha ka Nongbah” ula ong.
Haba kylli, u Bah Prestone ula ong “Ka jingkhang ïa ki dukan kan khanglad ïa ki nong Assam ban wan thied jing thied na Meghalaya. Ngi la don ruh ïa ki rukom treikam ban khang ïa ka ïarung ïamih, ïa ïaid ïa ieng ha kine ki shnong khappud nalor ka jingdon jong ki Dorbar Shnong kiba don la ki jong ki buit treikam ban tehlakam ïa ka jingsaphriang jong ka khlam”.
Ha kajuh ka por, u Symbud Myntri Rangbah ula pyntip ba ka Sorkar Jylla kala rai ban pynbteng ïa ka jingkhang dam ïa ka ïarung ïamih jong ki briew na kawei ka Jylla sha kawei pat tad haduh ka 15 tarik u Naitung.
“Ïa ka jingïarung ïamih ki briew na kawei ka Jylla sha kawei pat, la bteng ban khang shuwa haduh ka 15 tarik Naitung..kane ka shong ruh ha ka jinglong jingman ïa kaba lah ban nang pynjlan shuh shuh” ula ong haba pyntip ba ka Sorkar kala shim ïa kane ka rai namar ka jingïohi ïa ka jingkiew ka jingïohpang COVID-19 ki briew ha Assam.

 

ïoh pang COVID sa ka kurim u driver ki BSF
Shillong, Jylliew 29 : Sa ka kurim jong u nongñiah kali ne driver ki BSF ka la ïoh ïa kane ka jingpang khlam COVID-19 mynta ka sngi. Ka result ba la shim na ki high risk contant ne kiba ïajan bha bad ki BSF kiba la ïoh ka la paw mynta ka sngi bad napdeng kiba la test kane ka longkmie ka la long positive.
Da ka jingïoh jong kane , ki don saw ngut mynta kiba ïoh ïa kane ka khlam ha BSF Head Quarter Umpling tangba ki shah sumar ruh haka hospital jong ki BSF hi ha katei ka jaka namar ka don la ka jong ka isolation ward kaba la pynkhreh da ki doktor bad ki nurse jong ki BSF hi.
Ka jingdon kiba ïoh ïa kane ka khlam ha ka jylla mynta ka la kiew sha ka 51 ngut, iwei ba la khlad, 42 ngut ba la koit bad 8 ngut kiba dang pang ne dang long active une u khniang jingpang.