Press "Enter" to skip to content

T. 51.80 klur pyllait ka Sorkar Jylla ban ïarap ïa kiba shah lynshop ha ka mariang

Jan kot T. 6 klur ban ïa khun pyrshah ïa ka COVID-19

Shillong, Jylliew 29: U Myntri Sorkar Jylla ba dei peit ïa ka tnad Revenue and Disaster Management, u Bah Kyrmen Shylla u la pyntip ba ka Sorkar Jylla, dang shen, ka la pyllait ïa ka pisa kaba long T. 51.80 klur na ka State Disaster Response Fund (SDRF) sha baroh 11 tylli ki district ha ka Jylla.
“Kane pisa ba la pyllait ka dei ka jingïarap pisa sha ki lanot kiba la ngat ha ka jingshah lynshop ki bor mariang kiba la lynshop ïa ka Jylla ha u snem ba la dep”, la ong u Bah Kyrmen Shylla ha ki nongthoh khubor ha ka sngi nyngkong.
U la pyntip ruh ba ka jingïarap pisa ba la pyllait da ka Sorkar sha ki lanot ba shah ktah ka kynthup ïa ka jingbei tyngka na ka bynta ka jinglut jingsep bad ka jingïarap pisa sha ki longïing jong kiba la khlad noh na ka jinglynshop ki bor mariang.
Haba ai jingtip bniah ha ka jingai jingïarap pisa sha baroh ki 11 tylli ki district, u la pyntip ba ka pisa lyngba ka SDRF ka long T. 35.17 klur (West Garo Hills), T. 4.87 klur (South West Garo Hills), T .1 klur (East Khasi Hills), T. 15.39 lakh (East Jaiñtia Hills), T. 1.32 klur (East Garo Hills), T. 1.18 klur (Ri-Bhoi), T. 04.14 klur (North Garo Hills), T. 2.56 klur (South Garo Hills), T. 5.52 klur (South West Garo Hills) bad T. 26,000/- (West Jaiñtia Hills).
Ha kaba ïa dei bad ka pisa ba la pyllait da ka tnad na ka bynta ka jingïakhun pyrshah ïa ka jingpang COVID-19, u Bah Kyrmen Shylla u la ong ba la pyllait lypa T. 5.30 klur sha ki deputy commissioner ha ki district bapher bapher ban ïaleh pyrshah ïa ka jingpang COVID-19.
Da kaba pyntip ba ka tnad ka la pyllait T.15.45 lakh sha u Deputy Secretary of Secretary Administration Department ban thied ïa ki tiar ïada COVID-19, u Myntri u la ong ruh ba la pyllait T. 23.46 lakh sha ka tnad Home (police) bad T.14.52 lakh sha ka tnad Urban Affairs ban thied ïa ki mask, sanitizer bad kiwei pat. U la pyntip ha ki 24 kynta haduh hynne ka janmiet sngi nyngkong ha East Khasi Hills ka la don ka jingtwa khyndew bad jingshlei um ha Mylliem, Mawkynrew, bad Songra Sub Division. Ka la don ka jingjjia pluh ding ha Songsak, East Garo Hills bad ka la don ka jingbeh eriong ha South Garo Hills.
U la ong ba ki don ki shnong kumba 21 tylli ki shnong kiba shah ktah ha ki bor mariang ha kine ki 24 kynta bad haba kheiñ kyllum naduh ka1 tarik u Ïaiong, 2020 ki don 617 tylli ki shnong kiba la shah ktah. Ki don 16 hajar tam ki briew kiba la shah ktah bad haba kheiñ kyllum naduh ka 1 tarik u Ïaiong, 2020 ki don palat 15 lak tam kiba shah ktah ha ki bor mariang.
Naduh ka 1 tarik u Ïaiong, ka la don ka jingduh ïa hynriew ngut ki mynsiem briew bad kiba la mynsaw ki long 13 ngut. Ki ing shong briew kiba la shah ktah ki long 2117 tylli bad ki la don ka jingshah pynjulor ki surok, ki National Highway bad kiwei kiwei pat.