Press "Enter" to skip to content

Yn ai lad biang ka DS TuberKmai Shnong ïa ki rawon ban khwai ha Wah Myntdu

Ha ryngkat ki kyndon ba la bthah

Khliehrriat Jylliew 29: Hadien ka jingpyn jari ka Dorbar shnong TuberKmaishnong ban khwai dohkha ha wah Myntdu, mynta ka Dorbar Shnong ka la shah pat ïa ki rawon ba kin wan khwai dohkha ha wah Myntdu bad ïa kito ki rawon kiba na bar shnong yn shah naduh ka 1 tarik u naitung 2020,halor kane ka jing ailad,ka Dorbar shnong ka la buh ruh ryngkat lang bad ki kyndon aiñ ba ki rawon ki dei ban bud ryntih kaba long na ka bynta ka jingbit jingbiang lang jong baroh lang solansar bad lada don kino kino ki jingpyn kylla ka Dorbar Shnong kan sa pyntip lyngba ki pathai khubor.
Katkum ki kyndon aiñ jong ka shnong la ong ba yn shah ban khwai ha baroh ki bynta ka Wah Myntdu lait noh tang ha ka bynta ne area kaba ju khot ” ka Spaiñ ” ( kata naduh ka Liar Muchai haduh Liar Sakbu ), namar kane ka bynta jong ka wah Myntdu ka dei kaba ka Dorbar Shnong kala dep mana lypa naduh ki por ba la dep (Prohibited Fishing Area) namar kane ka bynta ka dei ka ‘Fish Sanctuary’lane ka jaka ban pynneh pynsah ïa ki dohkha bad ki doh-um.
Yn shah tang uwei u ryngwiang khwai ( Pyrsieh Khwai) ïa uwei u wei u rawon,u wei u rawon um lah ban pyndonkam bun tylli ki ryngwiang khwai.
La mana ruh ba ym shah ïa ki rawon ban khwai rock,khwai pyndem, tong jar,ban pyn bthei bom ding (dynamite blasting),ban shoh kharu ne ai dawai bih ïa ki doh um,ban pynrngad ïa ka um bad ban beh thong ïa ki dohkha ne doh um.
Ka Dorbar shnong kan ailad ïa ki rawon ba kin shong khwai tang ha ka por mynsngi, kata naduh 6 baje mynstep haduh 6 jan miet,ha kaba yn ym shah ban khwai miet ne sah miet ha wah.
La mana ruh ba ym dei ban bret pathar ïa ki bitor kyiad,ki bitor um plastic,ym dei ruh ban pyn jakhlia ïa ki lum ki wah.
Ym shah ban siat pyniap bad ban beh thong ïa ki mrad kiba don ha ki khlaw,ym shah ïa ki briew ban pom dieng pathar ha ki ‘law kyntang bad ki khlaw Shnong,Ym shah ban thang ding ne thang ïa ki lum ki khlaw,ym shah ïa ki briew ban thaw jingkulmar bad leh kino kino ki kam awria hapoh u pud u sam jong ka shnong.
La ong ba lada don kino kino kiba leh pyrshah ne pynkheiñ ïa kitei ki aiñ bad ki adong ba la mana,ka Dorbar Shnong kan pynshitom ïa ki katkum ki aiñ Shnong bad yn aiti ruh ïa kiba leh pyrshah sha ki bor jong ka aiñ sorkar.Kane ka long katkum u kyrwoh ba la phah da u bah Wanthmu Phawa,Adviser Shnong TuberKmaishnong.