Press "Enter" to skip to content

Yn ym don jingpynkylla Myntri sorkar, lah ban don tangka jingbate kam thymmai

Shillong,Jylliew 29 : Wat la ka samoi ban ïabujli Myntri Sorkar ka la jan dei artat, hynrei ka tyllong khubor kaba la ïoh da u nongthoh khubor kaba ïajan bha bad ki nongïalam kane ka sorkar ka ïathuh ba kan ym don ka jingïa bujli myntri hynrei ka lah ban don tang ka jingbate kam ïa ki myntri hapoh kane ka sorkar Meghalaya Democratic Alliance (MDA).
Haba ïakren bad ki nongïalam ki bym kwah ban pynpaw kyrteng ki la ong “ Hooid wat la u myntri rangbah u shaniah ha la ki party ba kin ïa pynbeit ïa kane ka kam, hynrei la sngewthuh ba ki MLA ki la dep ïa pynbeit para maki ba kin neh beit kine ki juh haduh ba kut tangba halor ka nongrim ba kine kiba don ha ka shuki mynta ki hap ban ïarap beit ïa kano kano ka kam jong ki MLA jongki khamtam ha kaba ïadei bad ki skhim pynroi pynpar sha ki constituency jongki”.
La ïathuh ruh ba u Myntri Rangbah um lah ban leh ei ei na ka liang jongu ban bujli myntri hi namar kane ka dei ka jingïakut kaba tang da ka ktien ha ka por ba thaw ïa kane ka sorkar MDA bad kam don satia ka jingthoh kaba la ïasoi da ki MLA. Kumta na kata ka daw ba u Myntri Rangbah u shaniah beit ha ka jingpynbeit ki party namar um kwah ban mushlia ïa kaei ka jingïapynbeit jong ki MLA jong ki party kiba ïa synrop lang ha kane ka sorkar MDA.
Tangba la ïathuh ba u Myntri Rangbah u lah ban leh pat ïa ka jingbate kam thymmai ïa ki myntri jongu hadien ba la kham thynda kane ka jingïakhun ïa kane ka thma khlam COVID-19.