Press "Enter" to skip to content

Ba shimkhia ka Dorbar Shnong Tymphang, kylla dur ka Iawmusiang hadien ba ladep pynkhuid

Jowai, Jylliew, 30: Ka Dorbar Shnong Tympang-Iawmusiang, Jowai mynta ka sngi ka la shim ïa ka jingkitkhleih ban wanrah ïa ka khuid ka suba bad ka jingitynnad ka Iawmusiang, da kaba pynlong ïa ka ‘jingpynkhuid (Cleaning Drive) cum Awareness Programme’ kaba la sdang naduh ka por 9 baje mynstep bad la ïohi shisha ba ka Iawmusiang ka la kylla dur ha ka jingkhuid jingsuba khamtam ha ki bynta jong ka surok (Main Road) na H.K Singh Secondary School, Jowai haduh lad Police Point.
Ha kane ka jingpynkhuid la wan ban ïashim bynta da ki nongtrei ka Jowai Municipal Board (JMB), ki nongshong iew, ki dkhot ka JTTA, JTA, ka seng ki nongñiah kali (Local & Tourist), ki Pulit bad kiwei kiwei de.
Ha shwa ka jingpynkhuid ïa ka Iawmusiang la pynlong ïa ka jingïalang kaba lyngkot. U ma E. S. Shylla Waheh Shnong ka Dorbar Shnong Tympang-Iawmusiang ha ka jingkren u ong kum ka shnong kaba peit ïa ka bha ka miat bad ka jingitynnad, ka shnong kam kwah ba ka Iawmusiang kaba dei ruh ka it khmih jong ka sor Jowai kan don hapdeng ka jingjakhlia bad ka jingsniewdur.
Ha ka juh ka por ula kyntu ïa baroh ki nongshong iew kumjuh ruh ïa ki nongleit leit iew leit hat, ba kin ïatreilang lang bad ki bor pynïaid shnong na ka bynta ban wan rah ïa ka jingkhuid jingsuba jong ka Iawmusiang baroh kawei ha kine ki sngi ban wan.
ïa ka jingïalang la pynïaid da u ma W. Nartiang, ha ka jingïadonlang u President ka Synjuk ki Waheh Shnong, Jowai ma A. Niangti bad kiwei de ki Waheh Shnong na ki dong bapher bapher.
Na ka liang u Dr. P. Syngkon Waheh Shnong ka Tpep-pale Jowai hashwa ba un plie ïa kane ka prokram jingpynkhuid, ula ong ba ka jingjied jong ka DS Iawmusiang ban pynkhuid ïa ka Iew hakum kane ka sngi ka long kaba donkam bad kaba biang eh namar ka long ruh ka por ba ka Seiñraij ka juh pynkhuid ïa ki iew ki hat hashwa ka lehñiam Behdeiñkhlam. U Dr Syngkon u don ka jingangnud ban ïohi nangne shakhmat ba ka Iawmusiang Jowai kan long kaba khuid ba suba.
Shuh shuh ka shnong ka ai khublei kyrpang ïa baroh kiba la wan ban ïashim bynta ha kane ka sngi, kiba la pynlong ïa prokram kaba ïaidbeit ïaid ryntih bad kaba jop.