Press "Enter" to skip to content

Ban khanglad ïa ka jingtih shyiap bad maw beaiñ na Wah Umïam, pynjari section 144 CrPC ka DC Ri Bhoi

Nongpoh, Jylliew 30: Ka Deputy Commissioner ka Ri Bhoi District, ka Kong R.M Kurbah kum ka District Magistrate mynta ka sngi ka la pynjari syndon da ka Section 144 CrPC ha Ri Bhoi District na ka bynta ban khanglad halor ka jingtih shyipa bad maw beaiñ na ka Wah Umiam kaba hap ha Ri Bhoi District.
Kum ban pynpaw paidbah, ka Deputy Commissioner ka Ri Bhoi ka Kong R.M Kurbah ka la pynjari ruh ïa kane ka kyndon aiñ, ka dei hadien ba ka ophis jong ka ka la ioh pdiang ïa ka jingujor halor ka jingdon jong ka jingtih shyiap bad tih maw na ka Wah Umiam ba hap ha u pud u sam jong ka Shnong Mawrathud bad ka Shnong Bersiej ba hap ha ka Mawhati Constituency ha Ri Bhoi District.
Lyngba katei ka kyndon ba la pynjari da ka Kong R.M Kurbah kum ka khlieh duh ka District, la ong ba ka jingtih shyiap bad tih maw na katei ka wah kan wan rah ka jingpynjot ïa ka mei mariaing bad ka jingktah ïa baroh ki kynja ba im kiba shong basah ha ha shi lynter katei ka wah bad ha kajuh ka por ka buh jingma ruh ba ki maw kin shong kynrong bad kin nym skhem shuh haba la tih ïa u shyipa bad u maw na katei ka wah.
Kane ka kyndon aiñ ka la khang pyrshah ruh halor ka jingtih maw bad tih shyiap na katei ka wah ka dei halor ka nongrim ba ka don ruh ka jingma ka ban ktah halor ka jingiadei jong baroh ki kynja baim bad kan ktah ruh wat ha ki bynta jong ka jingtuid ka um ha shi lyner ka wah.
Dei halor kitei ki jingma kiba lah ban ktah ïa ka mei mariang bad ruh ïa baroh ki kynja baim kiba shong basah ha katei ka wan, la pynjari ruh da kane ka kyndon aiñ ban khang pyrshah halor ka jingtih shyiap bad maw la ki dei ki riew shimet ne ki kynhun ba kane ka lah ban khyllem ïa ki rud wah bad kumjuh ruh ïa ki jinglong jingman jongka wah kaba lah ban kylla kumba ka dei ban long.
Namarkata, kumba la pynkup bor katkum ka section 144 CrPC, ka District Magistrate ka Ri Bhoi, ka Kong R.M Kurbah, ka la pynjari ïa kane ka kyndon aiñ ba la khang pyrshah syndon ïa kino kino ki riew shimet ne ki kynhun ban tih shyiap ne maw na katei ka wah ba ka ktah ïa ka mei mariang bad lada lap pat ïa kito kiba ïaleh pyrshah kin sa shah pynshitom katkum ki kyndon jong katei ka aiñ.
Kane ka hukum la pynjari ba ka la treikam mardor bad kan dang treikam ruh katba ym pat pynbna pat da kumwei pat, ong ka tyllong khubor na ka kyrwoh ba la pynlait da ka Kong R.M Kurbah, Deputy Commissioner ka Ri Bhoi District.