Press "Enter" to skip to content

Bitar shla ki paidbah na lai shnong ba trei torti ka Company ïa ka surok Sarin-Nongkynbah

La ar snem tam ym shym la pyndep satia ïa ka kam:
Mawkyrwat, Jylliew 30: Ki paidbah nongshong shnong na ki lai tylli ki shnong kiba hap ha Ranikor Block kata ka shnong Sarin, Shnong Nongkynbah bad Shnong Nongpdengkenbah, ki la pynpaw ka jingbitar shla na ka jingtrei torti jong ka Company shna surok ba pyntrei ïa ka surok Sarin Nongkynbah namar ha kine ki por slap bun ki kali ki la shu sahkut ha shiteng lynti bad duh lut ïa ki kam ki jam ba ki ki thmu ban pyndep.
Ha ka kyrwoh khubor ba la phah da u Myntri shnong Sarin u bah Blossding W. Wanñiang ula ong ba ki paid jong kitei ki lai tylli ki shnong ha u snem 2017-18 ki la kmen ba ïa ka surok Sarin – Nongkynbah ba la ïoh ïa ka mang tyngka na ka sorkar India ban siang rong noh ïa ka surok Sarin-Nongkynbah ba 12.25 km ha ka jinglut kaba 7 klur 40 lakh ba la ai trei ha kawei ka company na Bihar ka M/S Bhawani Construction and Company, Madhubani kaba dei ban trei pyndep ha u bnai Kyllalyngkot, 2019.
Hynrei phewse katei ka company haduh mynta la ar snem tam kam shym la pyndep satia ïa ka kam bad ka la shu ieh lyngkrang bad ym don nongtrei shuh wat tang iwei ruh bad kaba sngewsih bad kaba pynbitar eh ïa ki nongshong shnong ka dei ba la shu ieh khlem akor bad leh bym suidñiew ïa ka surok, buh ki tiar kat haba lap ba shem kaba la wan rah ïa ka jingwit ïa ki lynti ïaid, khamtam ïa kawei ka Road Roller ha kaba mynta kane ka kali ka la hap sha ‘liew muri mynta la 9 bnai ei ei.
“Ka jinghap jong kane ka Roller, ka la pynsah kut ïa ka um ba dei ban tuid bad ka umslap umsaw ka la shlei sha surok bad ka la long ka dawbah dawsan jong ka jingtwa surok bad ka surok ka la jot rathai mynta la arsien arwat lynter”, ula ong bad na ka liang ki paidbah nongshong shnong jong kane ka thaiñ ruh ki la im kordit hynrei kane ka company haduh mynta ka khlem wan mih syrngiew syrnget satia.
Namarkata, ki paidbah jong ki lai shnong ki la dumok bad maham tyngeh ia ka company ne trai katei ka roller ba wan bret ha ‘liew muri kim wan tan noh ha kine ki khyndiat sngi ki paidbah kin tan hi noh ïa katei ka roller bad die nongra.
Shuh shuh ki paid nongshong shnong ki pynpaw ka jingai khublei sngewnguh ïa u MLA ka thaiñ, Engineer, SDO ka PWD Ranikor Division bad u bah G. Shangdiar ba dei peit ïa kane ka surok kiba la ïarap ban moramot kyrkieh ban pyndep ïa kane ka surok bad kum ki paidbah ki khmih lynti ruh ba mynta ha kane ka kynti lada kin dang sngewsynei biang ban ïarap ban moramot kham kloi katba lah.
“Kyntang ïawai ki paidbah nongshong shnong jong ki lai shnong ki kyrpad ïa u Chief Engineer PWD jong ka sorkar Jylla bad ïa u PWD Minister badonburom ba kin pynduh pyndam noh shi syndon ïa kane ka contract jong katei ka company wan pynjot surok”, ula ong