Press "Enter" to skip to content

ïoh COVID 19 sa uwei u BSF, kiew ka jylla sha ka 10 ngut

Shillong, Jylliew, 30: Ka Jylla Meghalaya mynta ka sngi Baar ka la sakhi sa ar ngut kiba ngat ha ka jingpang COVID-19 ha kaba uwei u dei u shipai BSF uba la wan na Bihar sha Tura bad uwei pat udei u Branch Manager jong ka SBI, Khliehriat.
U BSF mynta u don ha Quarantine Centre ha Tura bad lah ban pynkynriah noh ïa u sha Tura Civil Hospital. Une u Manager, udei uba dang wan phai na nongbah Guwahati ban leit shimti kam kum u Branch Manager jong ka State Bank of India ha Khliehriat, East Jaiñtia Hills District
Haduh mynta ka sngi Baar, ha Meghalaya ki nongshong shnong kiba la ngat ha ka jingpang COVID-19 ki long 10 ngut bad 42 ngut ki la ïoh biang ïa ka jingkoit jingkhiah. Haba kheiñ kylllum haduh mynta ki don baroh 53 ngut ki briew kiba la ngat ha kane ka jingpang bad uwei uba la duh noh ïa ka jingim.
U Myntri jong ka tnat ka Koit ka Khiah u Bah Alexander L. Hek ha ka jingïakren bad ki lad pathai khubor mynta ka sngi Baar u la ïathuh ba ka Sorkar ka la phah leh ïa ka Test haduh 19,326 ngut bad 19028 ngut la shem ba ki long Negative, katba 246 ngut ki dei kiba dang ap ïa ka kaiphod na kaba leh ïa ka Test.
Haba shimkyllum ïa ka jingdon jong ki nongshong shnong ha ki District bapher bapher kiba la ngat ha ka jingpang COVID-19 ki long 5 ngut ha East Khasi Hills District, 1 ha Ribhoi District, 2 ngut ha South West Garo Hills District bad 1 ha East Jaiñtia Hills District.
Ha kaba ïadei bad ki nongshong shnong ka Meghalaya kiba la wan phai sha ka jylla haduh mynta ka sngi Baar ki long 19016 ngut.