Press "Enter" to skip to content

La synjor ka jingpyrkhing ïa ka Curfew ïaid mon ki kali ym don jingtalasi

Hiar lut u jhur na Meghalaya sha Assam:

Shillong, Jylliew 30 : Naduh ki paidbah haduh ki bor synshar ki la sdang ban kheiñ sting bha mynta ïa kane ka jingpang khlam COVID-19 namar lada phai sha ki paidbah ruh kim i salia shuh namar ym don shuh ka jingshim khia ban deng ïa ki mask bad ban ym ïa tur jan ne ban pynia jngai iwei na iwei ne kata ka social distancing la ka dei ha ki jaka ïew jaka iap briew, jaka ïathoh shong kurim bad ter ter. Nalor kata wat ka jingpyrkhing ïa ka Curfew miet da ki bor synshar district bad bor pulit ruh kam don shuh mynta.
Balei ba ong kumno u nongthoh khubor haba u leit kylleng ki jaka u sakhi da lade ïa kane ba ki paidbah kim salia shuh namar kiba bun kim deng shuh ïa ki mask ha ki surok ne jaka ïew khamtam kito kiba die jingdie ha ki surok bah. Ha ki jaka ïew, jaka iap briew, jaka ïathoh la shu ïalum lymbrum ym don shuh ka social distancing.
Ha ka por miet wat hadien bala sdang ki kynta jongka curfew miet ruh ym don bor pulit shuh ban peit bad talasi ïa ka ïaid ka ïeng ki kali namar ki ïaid beit katba mon ym shuh kum ha kito ki por ba dang sdang ban pyrkhing bha ban ïada ïakane ka khlam.
Nalor kane kaba i lyngngoh ka long ba ki dukan ja bad shah ha ki surok bah ki la plie lut, ki trok kiba ïaid lynti ki ïeng bad ki bam ki dih, ki thied jhur bad ki briew jong ngi ruh kim idon jingtieng shuh.
Kaba ima ka long ba ka jingwan thied ia ki jhur da ki khar Assam na kane ka jylla namar da ki phew phew tylli ki trok ha ka shisngi ki wan kit ïa ki jhur na kane ka jylla ban pynhiar sha Assam bad kiwei kiwei ki jylla.
Dei ban kynmaw tang kawei kane ka khlam ka la nang kiew ha India man la ka sngi la jan da ki 20 hajar ngut beit kiba ïoh ia ka jingpang man la ka sngi, nangta ka la nang kiew ha Assam ka jylla ba marjan bad kumba paw mynta kat kiba wan phai na Assam sha ka jylla ki ïoh beit ïa ka jingpang namar tang ha kine ki khyndiat sngi ki la don haduh 5 ngut kiba wan phai na Assam kiba la ïoh ïa kane ka jingpang. Ki paidbah ki dei ban kynmaw ba ka jingpang ka la nang hajan bad ym dei ban kheiñ shngaiñ ïoh poi u pud ban long kum ha Assam ha kaba kane ka jingpang ka la pur bad saphriang sha ki paidbah bad man la ka sngi kiba ioh ia ka jingpang ka long beit da ki spah ngut namar ka tnad ka koit ka khiah ha katei ka jylla ka la eh ban tehlakam ïa kane ka jingpang.