Press "Enter" to skip to content

Ngam pat ïoh kyrwoh na ka KHADC halor ka jingthmu shna ïa ka Police Outpost ha Langpih: Rymbui

Shillong, Jylliew 30: U Myntri Sorkar Jylla ba dei peit ïa ka tnad Kam Pohïing, u Bah Lahkmen Rymbui u la ong ba haduh mynta um pat ïoh kano kano ka kyrwoh jingpyntip na ka Khasi Hills Autonomous District Council (KHADC) halor ka jingthmu ban shna ïa ka building ban aiti pat sha ka Sorkar ban pyndonkam ïa ka kum ka Police Outpost.
“Kumta ka Sorkar kam lah ban ong ba ka pdiang ne kan kyntait ïa ka jingthmu jong ka Khasi Hills Autonomous District Council (KHADC) ban tei ïa ka building na ka bynta ka Police Outpost ha ka shnong Langpih, kaba don ha khappud Meghalaya Assam”, la ong u Bah Lahkmen Rymbui haba jubab ïa ka jingkylli ki nongthoh khubor ha kamra treikam jong u ha ka sngi ba ar.
“Ka Sorkar haduh mynta kam pat ïoh ïa ka jingthoh na ka KHADC ne kam pat tip ïa ka jingmut jong ka Council”, u la ong da kaba u la bynrap, “Kaei ka kam jong ka Sorkar ha katei ka Outpost namar ka Sorkar ka hap ban da bishar bniah bha ïoh ka Council ka don pat da kawei ka jingmut. Ngin ap da ïoh jingthoh bad ngin sa peit bniah bha halor kane ka jingïakren ha KHADC”.
Dang shen, u Chief Executive Member (CEM) ka KHADC, u Bah Titos W Chyne, ha ka taiew ba la dep u la kular ha ka Ïing Dorbar jong ka Council ban shna ïa ka building ban aiti sha ka Sorkar Jylla ban pyndonkam ïa ka kum ka Police Outpost kum ka jingïarap ïa ka Sorkar bad kumjuh ban ïada ïa ki nongshong shnong ha Langpih na ka jingshah pynthut ha ki pulit Assam.
“Ka Council ka lah ban leh ïa kano kano ka kam hapoh u pud u sam jong ka hynrei ïa ka kam bad ki Pulit ka dei ka kamram jong ka Sorkar ban peit watla ka jingthmu ka long na ka bynta ka jingbhalang jong ki paidbah”, u la ong. U la ong ba ka sorkar kan sa pyntip bad ïa mynta kan ap shwa haduh ban da la ïoh ïa ka jingmut jong ka KHADC ban thaw ïa ka building na ka bynta ka Outpost.
“Ka Sorkar kam khang ïa ka jingthmu ban shna ïa ka building ban buh Outpost na ka bynta ka jingbha jong ka Jylla bad shong shngaiñ ki paidbah ha ki ki jaka khappud hynrei kam pat ïoh jingshai kumno ka jingïadei ka Outpost bad ka Council”, u la ong.
“Ka Sorkar na ka por sha ka por ka pyrshang ban pynbiang ïa ki jingdonkam ha baroh ki Outpost khamtam ban pynbha ïa kiba la don lypa bad ruh ka jingthmu bad ban buh ïa ki Outpost ba thymmai”, u la ong. “Ngin peit shwa kaei ka jingthmu ka Council halor kane bad ngin sa shim pat ïa ka rai”, u la ong.
Da ki spah klur mang ka sorkar ban pynlut ha ki jaka khappud, sahteng ban ïakren ki 2 CM namar u Covid 19, ong u bah Rymbui
Ha kawei pat ka liang haba ïa kren halor kiba ki nongshong shnong ha ki jaka khappud ki ïa kynduh jingeh, u Bah Lahkmen Rymbui u la ïathuh ba ka jingïakynduh hapdeng ki Myntri Rangbah jong ka jylla Assam bad Meghalaya ban ïa kren ïa ki jingeh ha ki jaka khappud ka la sahteng noh namar ka jingwan ka khlam COVID-19.
“Watla yn nym pat lah ban pynbeit mar mar ïa u pud u sam, hynrei ka jingïakren kan long ban burom markylliang ïa ka ‘status quo’ khnang ba ki paidbah ha khappud kin shong shngaiñ bad ïoh jingmyntoi”, u la ong
“Hynrei ka Sorkar hapoh ka jingïalam u Conrad K Sangma kum u Myntri Rangbah ka la pynlut da ki spah klur ban kyntiew ïa ki shnong ha ki jaka khappud khnang ba ki paidbah kiba sah ha khappud kin sngew shngaiñ”, u la ong.