Press "Enter" to skip to content

Ujor ki Seng bhalang sha u CS ba ai jaka sah Quarantine u DC ïa kiba na Assam

Tura, Jylliew 30 : Ki seng bhalang bapher bapher ha North Garo Hills ki la ai da ka jingthoh sha u Chief Secretary jongka jylla halor ka jingkynnoh ba u Deputy Commissioner jong katei ka district u la pynkheiñ ïaki kyndon jingbthah ne protocols da kaba la shah ïa ki san ngut ki briew kiba wan phai na Mumbai ban shong quarantine ha Mendipathar tang namar ba ki dei kiba ha ïing jong u heh saipan uba sah ha Assam mar khap bad ka Mendipathar.
Ka jingpyrshah ka long, nalor ba kine kim dei ki nong Meghalaya bad nalor ba ki wan na ka jaka Hotspot ne ka jaka ba kane ka khlam ka jur bha, hynrei la shah ba kin wan sha Mendipathar bad sah quarantine ha kane ka jaka.
Ki seng bhalang kiba kynthup ïa ka GSU, AYWO, AHAM ki la ïathuh ba une u heh saipan u Birendra Rajpurohit u dei u trai jongka Mega Mart Group kaba don ki tnad treikam ha katei ka district.
Kine ki seng bhalang ki pynpaw ba kane ka jingailad jong ki ophisar ïa kine ki briew ban wan rung shapoh ka jylla na Bajengdoba ka la
buh ka jingma kaba khraw ïa ki paid nongshong shnong jong ka jylla.
Ki la kynnoh ba une u heh saipan um dei u nong Meghalaya bad u sah wai ruh ha u pud jong ka Assam hynrei tang namar ba u dei u heh spah u don ka jingïadei kaba jan bad ki bor synshar district bad ki don ki ophisar kiba u ïadei bha kiba la shah ïa kine kiba ha ïing jongu ba kin wan rung sha ka jylla.
“ Ka long kaei kaei kaba ym lah ban mutdur kumno ba kine ki bor synshar district ki shah ïa kine kiba ha ïing jong une u heh spah ban wan bad sah ha ka Mendipathar Multipurpose Hall khlem da pyntip ïa ki briew ka koit ka khiah kiba peit ïa ka Mendipathar Community Health Centre. Nalor kata wat ki pulit ophisar bad ki bor synshar shnong ruh kim tip ei ei halor kane” ong ki seng bhalang.
Ha ka shithi ba ki la phah sha u Chief Secretary kine ki seng bhalang ki dawa ba dei ban khang noh mardor ïa kitei ki dukan jongune u heh spah bad kumjuh ruh ban pynshitom kat kum ka aiñ ïa ki bor synshar district kiba pynkheiñ ïa kine ki kyndon.