Press "Enter" to skip to content

Wat hadien ba khlad noh u Dr. Sailo : Ym don jinghiar ka jingwan ki nongpang ha Bethany Hospital

Shillong, Jylliew 30 : Ka Bethany Hospital naduh ba la plie biang ïa ka ha ka 23tarik u Jymmang mynta u snem kaba long kumba 40 sngi mynta, ka la sakhi ba kam shym la don satia ka jinghiar ki nongpang ba wan shah sumar wat hadien ka jingkhlad noh u trai jong ka, u Dr. John Sailo Ryntathiang na ka daw ka jingpang Coronavirus.
Na ka liang u Mawphor haba ïa kren bad u Dr. Kyntiewlang Sanmiet, Nodal Officer jong ka Bethany Hospital, u la ïathuh ba kim len ba shipor ka la don ka jingsyier na ki paidbah ban wan shah sumar ha katei ka hospital hadien ba u Dr. Sailo u la khlad noh na katei ka jingpang.
Hynrei u la ong pat ba katba nang ïaid ka por, ka jingwan ki nongpang ba wan shim dawai kumjuh kiba wan shah sumar kam da ïapher than na kaei kaba ju long ha ki snem baroh.
“Tad haduh mynta ka sngi katkum ki jingkheiñ ba ngi ïoh ka long ba tang kiba wan shim dawai ki la poi 3976 ngut, katba kito kiba wan sah shah sumar pat ki long 336 ngut,” u la ong.
Katkum ka jingong jong u, ka jingshaniah jongki paidbah kadei ka dak kaba shai tam kaba pynlong ïa ki nongpang ba kin phai khmat sha katei ka jaka sumar ban ïoh ïa ka jingkoit jingkhiah. U la ong ruh ba ka jingshaniah jong ki paidbah kadei namar na baroh 500 ngut ki nongtrei ym don satia iwei ruh iban ïoh ïa katei ka jingpang.
Shuh shuh u la pynkynmaw ba u Dr. Sailo naduh ba u dang khlaiñ u ju bthah bad pynkynmaw barabor ïa baroh ki nongtrei ba ha ka por ba don hapoh hospital ba ki dei ban deng beit ïa ki jingda durkhmat bad kumjuh ban sait bha ïa ki kti, kaba long kawei na ki jinghikai kaba haduh mynta mynne ki dang bud pyrkhing bha ha katei ka hospital.
“Mynta lei lei ngi la nang pynjanai shuh shuh ïa ka rukom treikam khamtam haba ïadei bad ka jingkhuid, nangta ban ym ailad ïa ki paidbah nongwan shim dawai ban shong jan,” u la ong da kaba ïathuh ruh ba haman la ki khyrdop ba ki paidbah kin rung ki la buh ïa ki jaka ban test kumjuh ban da synreit da ki dawai sait kti shwa ban rung shapoh.
Haba ïathuh pat halor ka lynti ïaid jong ki khamtam ha kito ki por ba katei ka hospital ka dang khangdam shipor, u Dr. Sanmiet u la ong ba ki bor pynïaid ki la leh bha haduh katta katta ïa ki namar ki la siew beit ïa ka tulop na ka bynta ar bnai kata jong u bnai Ïaiong bad Jymmang sha baroh 500 ngut ki nongtrei jong katei ka hospital, kata nalor ba ki ai tam ruh..
Ha kawei pat ka liang, u la ai ka jingïaroh ïa ka sorkar jylla kaba la kyrshan lang ïa ka hospital ha kawei pat ka liang da kaba pynbiang ïa ki jaka sah ïa ki nongtrei kiba hap ban set slung shipor ha kito ki por bad ruh wat ïa ka bam ka dih na bynta jong ki bad kiba haïing ha sem.
Ka khubor kaba sngewtynnad kaba utei u doktor u pynpaw ka long ba kum ka hospital hi kin ïai bteng ban ai ka jingshakri kaba bha tam ïa kiba pang ba shitom kumba la hikai da u Dr. Sailo naduh ka por ba u dang im.