Press "Enter" to skip to content

Ym bteng ka jingïoh khaw ei ki paidbah baduk haduh u Naiwieng: PM

Maham tyngeh ïa ki bym deng Mask ha ka Unlock 2:

New Delhi: U Myntri Rangbah duh jong ka ri, u Narendra Modi, ha ka sngi ba ar, u la pynbna ba ka jingsam khaw ei sha ki paidbah baduk lyngba ka skim Pradhan Mantri Gareeb Kalyan Yojana (PMGKY) kan dang bteng haduh u Naiwieng mynta ka snem.
U Modi, haba kren sha ki paidbah ka ri India lyngba ka Television, u la ong ba ka jingsam khaw kan lon na ka bynta ki 80 klur ngut ki nong India kiba duk kiba hap ha ka skhim reshon, ha kaba kito kiba don card AAY bad PHH kin ïoh mar 5 kilo u khaw marwei bad u dai mar shi kilo shi bnai.
Lah ban kdew hangne, ba u khaw AAY bad PHH, udei uba ka sorkar pdeng ka la sam naduh u bnau Jymmang mynta ka snem. “Ka sorkar kan pynlut kumba 90 klur tyngka na ka bynta une u khaw bad u dai”, la ong u Modi, da kaba bynrap ba kane ka jingïarap kadei namar ka jingkhang dam ka sorkar.
Ha kane ka jingkren, u Myntri Rangbah duh, u la ai burom ruh ïa ki nongrep bad ki nongsiew khajna, kiba la ïarap ha kaba pynneh ïa ka ïoh ka kot jong ka ri wat hapdeng ka jingpang Coronavirus kaba la ktah ïa palat 5 lak ngut ki nongshongshnnong jong ka ri.
Shuh shuh u Modi, u la ai ruh ka jingmaham kaba tyngeh ïa kito kiba pynkheiñ ïa ki kyndon ba la buh da ka sorkar ban ïaleh pyrshah ïa kane ka jingpang khlam, khamtam kito kiba leh sting ban deng ïa ki mask bad kiba bym kohnguh ïa ka jingpynïajngai iwei na iwei ne ka social distancing.
“Ha ka jingpyllait ïa ka jingkhang dam kaba nyngkong, ki don kiba la leh sting bad kane ka la ktah shibun”, la ong u Modi. U la ong ba ha kane ka jingpyllait kaba ar, ka sorkar kan leh tyngeh bad kan nym map satia la ïa u rit ne u khraw. “Ngi la poi ha ka aïom ba ka jingpang jyrhoh, ka jingshit bad ba ïong khlieh, ka la sdang jur. Kumta donkam ban kit bha ïalade”, u la ong.