Press "Enter" to skip to content

Ban pynjngai ïa lade na kiwei, dei ka jingïada ba bha tam ban lait na ka jingbit ka khlam

Haba don kiba shah ktah na ka jingpang COVID-19

Nongpoh, Naitung 31: U District Medical & Health Officer ka Ri Bhoi District kum shi bynta ban pynshai paidbah ba kim dei ban tieng ne klumar jingmut lada don kiba ioh pang COVID-19 ha kano kano ka longïing ne ka shnong bad kaba donkam hakhmat ka long ba kito kiba ïa dei kam ne kynduh ïa kitei ki briew kiba shah ktah ki hap ban pynjngai ïa lade na kiba haing hasem (Self quarantine) khnang lada ki shah ktah ne ym shah ktah kan long ka lad jingïada ban lait na ka jingbit katei ka khlam.“Kane ka jingpynshai paidbah u District Medical & Health Officer ka Ri Bhoi halor kane ka bynta ka dei hadien ba bun ki nongshong shnong tang hadien ba la don kiba ïoh pang COVID-19 ki la klumar jingmut bad don kiba la sheptieng ba ioh ki la shah ktah lang ha kaba ki la kwah noh ban test noh mardor bad kane ka long kaba bakla shibun ha kaba kim dei ban sheptieng ne klumar jingmut bad kaba donkam eh hakhmat ki hap ban shim ka jingkitkhlieh ban pynjngai noh ïa lade ban nym buh jingma ïa kiba haing hasem ne ïa ki nongshong shnong ha ka shnong kaba ki shong ki sah.“Haba ïa kren bad u Nongthoh Khubor u Mawphor, u District Medical & Health Officer ka Ri Bhoi, u Dr. M. Mawrie u la ong, ka sorkar na ka por sha ka por ka la ai ka jingpynshai kaba bniah kumno ban ïada ïa lade na ka jingbit kane ka khlam bad bun pat ki paidbah haduh kine ki sngi kim pat sngewthuh bad ki don kata ka jingsheptieng ne ka jingklumar jingmut lada don kino kiba ioh pang COVID-19 ha kaba ha ka jaka ba kin shim ki lad jingiada ki klumar jingmut pynban da ka jingsheptieng ba ioh ki la shah ktah bad ki kwah noh mar mar ban test ïa lade khlem da sngewthuh kumno ba dei ban shim ki lad jingïada.“U la ong ruh lada don mano ba ioh pang COVID-19 kaba donkam eh kim dei ban ïa jan ïa lade bad kito kiba la shah ktah bad ki hap ban pynjngai khnang ba u khniang jingpang un nym bit sha kiwei bad kata ruh donkam ban deng ki mask bad pynjngai la kumno kumno kumba 6 phut ka jingjngai.““Da kaba pynshai ruh hadienba la don kiba pang COVID-19 ki paidbah kim dei ban khih mynsiem ne shepting bad ban kwah noh ban ioh test noh mardor bad ka kamram kaba ki hap ban leh ïa lade ka dei ban pynjngai noh na kiwei haba ki sngewthuh ba ki don ka jingpher ha ka liang ka met bad lada kim don kano kano ka jingpher ha ka met ruh ki hap ban pynjngai ïa lade la kumno kumno haduh 14 sngi bad lada don pat ki dak ki shin ki dei ban pyntip pat mardor sha ki nongtrei ka tnad ka koit ka khiah ba kin wan ban tohkit kaktum ki kyndon ka tnad ka koit ka khiah” ong u Dr. Mawrie.“U la pynshai bniah ruh ïa kito kiba la don ki dak ki shin la donkam ban test noh mardor ban pynthikna la ki la ioh pang neem na ka khlam COVID-19 bad kiwei pat kiba shu ïa kynduh kam ym pat donkam ban test mardor bad ki hap shuwa ban sah ha ki Quarantine lane ki ha ban set slung ïa lade ha la ing la kumno kumno haduh 14 sngi ei ei bad dei ha kane ka por ki lah ban pyntip noh mardor sha ki tnad ka koit ka khiah la da don ki dak ki shin ba ki sngewthuh ba ka don ka jingktah ha ka met.“Shuh shuh, u la pynshai ruh sha ki paidbah ba kim dei ban don ka jingpeitkhmat ne ka jingibein haba don kiba pang COVID-19 ha shnong ha thaw na ha la ing la sem bad ka kamram kaba kum ki paidbah kiba bym pat shah ktah ki dei ban sumar bha ïa lade da kaba deng bha ka mask, ban pynjngai iwei ia iwei bad ruh ban sait bha ka kti lane ban lehkhuid leh plieh khnang ba ka khlam kan nym ioh lad ban pur sha kiwei, u la bynrap shuh shuh.