Press "Enter" to skip to content

Hukum ka MHRC ïa ka Sorkar ban tohkit halor ka jingjia Ganesh Das Hospital

Halor ka shithi ujor u MLA ba ïap i khyllung ha GD Hospital
Shillong, Naitung 31: Ka Meghalaya Human Rights Commission (MHRC) kala hukum ïa ka Sorkar Jylla ban thung da ka kynhun tohkit halor ka jingkynnoh ba kyntait ka Ganesh Das Hospital ban pynkha khun ïa ka Longkmie ba armet, kaba wan na ka Shnong ba shah pynhap hapoh ka Containment Zone.
ïa kane ka hukum ka Commission ka la pynmih mynta ka sngi hadien ba kala ïohi ha ki kot khubor bad ïoh pdiang ruh da ka jingujor na u MLA ka Mawlai Constituency u bah P.T Sawkmie namar ka shnong ba katei ka longkmie ka wan ka dei na Mawtawar kaba hap hapoh ka constituency jongu. U bah Sawkmie u la ai ka jingujor sha ka MHRC hynnin ka sngi halor kane ka jingjia ha Ganesh Das Hospital ha kaba u la dawa ba dei ban thung da ka jingtohkit bad siew bai lutksan ruh sha katei ka longïing.
Ka Commission kala phah notice sha ka Sorkar Jylla lyngba u Chief Secretary ban thung ïa ka jingtohkit halor kane ka kam hapoh ka 30 sngi.
Ka khubor ka ong ba ka Commission ka sngew ba kane ka kam ka dei ka jingpynkheiñ bad ïuhroit ïa ka hok longbriew kham tam ba ki bor Sorkar kim shym la lah ban pynthikna ïa ka hok ban im bad ban ai ïa ki lad jingsumar sha ki nongshong shnong, kaba dei ka hok tynrai. Ka ong ruh ba ka dei ka kamram jong ka Sorkar ban ai jingïada ïa baroh ki hok jong ki nongshongshnong ka Ri.
Ka Commission ka ong ruh ba ka long kaba lyngngoh ba na kaei ka daw ba kane Hospital Sorkar kaba khmih bad pynïaid da ki Nongtrei Sorkar, kala kyntait ban pynrung bad ai jingsumar ïa kane ka nongpang.
Lah ban kdew hangne ba ka Ganesh Das Hospital kala kyntait ban pdiang ïa ine i Longkmie ba suhkha khun ha ka 28 tarik Naitung 2020 ha ka por 7.30 baje mynstep ba leit rah ïa i sha hospital tang namar ba i dei na Mawlai Mawtawar, ka shnong kaba shah pynhap hapoh ka Containment Zone bad ai daw ba ym don jingthiah shuh ha Isolation ward. Hynrei da ka jingtuklar jong ki kynhun Sengbhalang bad jingshim khia hi da lade jong u Director of Health Service (DHS)(MI) u Dr A War ïa ine i longkmie la pynrung ha Hospital haduh ka por 3.30 baje janmiet kaba long haduh 8 kynta naduh ba i suhkha. Namar haba i la mih na Ganesh Das hospital bad leit sha Robert Hospital ruh katei ka hospital kam shym la pdiang ïa i kumta i la hap ban leit phai noh sha la ïing. Dei na kane ka daw ba la slem palat ka por ba i khyllung i la khlad noh lehse ha ka por ba kha ka kmie ha katei ka janmiet por kumba 7.30 PM.
La kynnoh ba ka jingpynslem ban ai jingsumar jong kane ka Hospital Sorkar ka dei ka daw bah ba khlad noh i Khunlong hashuwa ban mih sha kane ka pyrthei.
U bah Sawkmie u la ïathuh, kumba ka la jia ïa kawei ka long kmie ha Utter Pradesh ha ka 12 tarik Nailar 1999 ba ka la khlad noh tang namar ka jingleh meng bad leh baheh ki nurse jongka District Hospital Siddharth Nagar namar kim shym la pdiang ïa ka mar ïa poi ha ka hospital wat la ka don hapdeng ka jingsuh kha kaba jur ruh. Dei tad haduh ba la dier ka por bad ba kim lah shuh ban sumar ba ki sa phah ïa ka ban leit noh sha Gorakhpur, hynrei namar ba la pyslem palat ïaka jingsumar tang namar ba u kurim jongka um lah ban siew ïa ka pisa ba la pan da ki nurse kaba long 250 tyngka, ka la khlad noh shwa ban ïoh pynkynriah sha Gorakhpur.
Halor kane ka Human Rights Commission jong katei ka jylla ka la shim khia bad hukum ïa ka sorkar Utter Pradesh ban siew shwa mar mar 50, 000 tyngka sha ka long ïing jong ka longkmie katba ym pat dep ïa ka jingtohkit.