Press "Enter" to skip to content

Ieng pyrshah ka SBYWA & KSU lada thmu die lilam ka JHADC ïa ki wah ha khappud

Khliehriat, Naitung, 31: Ki ar tylli ki sengbhalang na East Jaiñtia Hills kiba kynthup ïa ka Southern Border Youth Welfare Association (SBYWA) bad ka Khasi Students Union (KSU) Hingaria Unit lem bad ki paidbah jong ka shnong Hingaria ki la pynpaw ka jingsngew khia ïa ka jingjyllei palat ki briew kiba ju ber dawai ïa ki wah ba pyniap pathar ïa ki dohkha.
Ha ka shithi ba ki la phah sha u Special Officer (SAFM) jong ka Jaiñtia Hills Autonomous District Council (JHADC) ki la pynpaw ba kine ki sengbhalang lem bad u Secretary shnong Hingaria kin ieng pyrshah lada ka JHADC kan die lilam ïa ka wah Prang, wah Tisang bad ki baaroh ki wah heh ki wah rit kiba don ha ki thaiñ khappud bad ka ri Bangladesh sha ki riewshimet lane sha kino kino ki kynhun ne ki Kompeni. Kane ka jing pyrshah jong ki ka long shi bynta ban pynneh pynsah ïa ki dohum dohwa bad ia ki jingthaw ba im ha um.
Katkum ka shithi ba la soi kyrteng da u President ka SBYWA u Bah Skhembor Shadap bad u President jong ka KSU Hingaria Unit u Bah Samson Lamin bad u Secretary Shnong jong ka shnong Hingaria u Ma Garness Talang ki la pynpaw ba ka ju don ka jingwieh dawai, ka jing ther bom ïa ki wah ban pyniap dusmon ïa ki dohkha.
Ha kane ka shithi ki la kyrpad ïa ka JHADC ba kan leh ïa kaba donkam na ka bynta ban ïada lane ban lapynneh pynsah ïa ki doh um kaba katkum ka aiñ mariang jong ka Council lyngba ka UKJHD Fisheries Act 1954.
Kum ka jingai jingmut, ka SBYWA,ka KSU Hingaria bad u Secretary Shnong Hingaria ki la kyrpad ïa ka JHADC ban buh noh da u nongap ïa ki wah, ban daiñ kuna kaba heh lada don mano mano ba pynkheiñ ïa ka aiñ, ryngkat ka jingai buskit ia kino kino ki briew kiba lap ïa kiba pyniap pathar ïa ki doh um ha Wah Prang, Wah Tisang bad ki la kyrpad ruh ïa ka JHADC ba kan ai noh da ka jingthoh sha baroh ki Dorbar Shnong kiba don ha ki thaiñ khappud ba kin pynlong ïa ka jingpyrta shnong khnang ba ki paidbah kin dup tip ïa ki aiñ jong ka Council kaba katkum ka UKJHD Fisheries Act 1954.