Press "Enter" to skip to content

Lah ban slem biang ïa ka jingsam khusnam National Sport Award 2020

Namar ka khlam Coronavirus

New Delhi, Naitung 31: Ka jingsam khusnam National Sports Award mynta u snem ka lah ban shim por biang sa kumba shi bnai lane ar bnai na ka daw kane ka jingpang khlam Coronavirus, hynrei ïa ka rai ba khatduh yn sa shim tad haduh ban da ïoh pdiang ïa ka jing bthah na ka Rashtrapati Bhavan, ong ka kyrwoh khubor na ka sport ministry.
Ïa ka National Sports Awards ba kynthup ïa ka Rajiv Gandhi Khel Ratna, Arjuna, Dronacharya bad ïa ka Dhyanchand, la ju sam manla u snem da u President jong ka Ri India ha ka jingïalang kaba ju pynlong ha Rashtrapati Bhavan ha ka 29 tarik u Nailar.
Ïa katei ka jingïalang la pynlong kum shi bynta ban rakhe ïa ka sngikha jong u khlur ïalehkai Hockey ka Ri u Major Dhyan Chand. Hynrei mynta u snem ka lah ban slem na ka daw kane ka khlam jingpang, pynban watla katta ka Sports minstry ka dang ïai ap pat ban shim ïa ka rai.
“Haduh mynta ngim pat ïoh sngew eiei na ka Rashtrapati Bhavan. Ngi dang ap ban ïoh jingtip ha kaba ïadei bad ka jingsam National Award. Te kumta ha kaba kum kane ka por, ka dang long kaba eh ban ong ba lano kan urlong,” ong ka tyllong khubor na ka Ministry.
“Kumba ka long mynta ïa kino kino ki jingïalang paidbah ym pat shah ha kylleng jong ka Ri na ka daw ka COVID-19, kumta kam don kano kano ka jingïalang ban pynlong ha Rashtrapati Bhavan. Ha u snem ba lah dep ruh la pynslem teng ïa kane ka jingsam khusnam, kumta lada ym lah ban pynlong ha ka 29 tarik u Nailar, ngi lah ban pynlong noh hadien shibnai lane ar bnai. Ïa mynta ka koit ka khiah jong ki paidbah ka long kaba hakhmat eh,” bynrap ka kyrwoh.
Kane ka khlam ha u bnai ba lah dep ka la pynbor biang ïa ka sport ministry ban pynjlan ïa ka tarik thep kyrteng bad shah ruh ïa ki nongïalehkai ban thep hi ïa ki kyrteng namar ka jingeh ban ïakynduh ïa ki nong jied namar ka lockdown.
Ka jingailad jong ka Ministry ban thep hi ïa ki kyrteng la sakhi ruh ka jingbun jong ki kyrteng kiba thep ban ïakhun na ka bynta katei ka khusnam. Hynrei haduh mynta ka Sports minstry kam pat thaw kano kano ka komiti kaban jied na ka bynta ki nongjop watla ka dang sah mynta satang shi bnai ban pynlong ïa katei ka jingsam khusnam.
Haduh mynta ka ministry kam pat peit ruh ïa ki jingthep kyrteng watla kane ka jingpynslem kan ym lah lait.
“Ïa ka jingsam khusnam mynta u snem yn sa buhteng shuwa khlem da buhpor namar kat haduh mynta ym pat shym la sdang ban khmih ne peit bniah ïa ki jingthep kyrteng. Hynrei ïa ki khusnam yn sa ai beit ha kano kano ka por ruh,” ong ka tyllong khubor na ka ministry.