Press "Enter" to skip to content

Naduh ka 01 tarik u Nailar yn daiñ kuna ïa ki briew kiba pynkheiñ ïa ki aiñ ba la bthah

Mawkyrwat, Naitung 31: Ka Mawkyrwat Market Covid-19 Management Committee ha ka ka jingïalang ba la pynlong mynta ka sngi ka 31 tarik u Nailar, 2020 hapoh jong ka ophis jong u Manager Sankur Rikynti Khaiñ Nonglang & Mawkyrwat Hat, ki dkhot kiba don ha ka ryngkat u Zonal bad Sector ba dei peit ïa ka ïew ki la rai ba naduh ka 01 tarik u Nailar, 2020 yn daiñ kuna ïa kiba pynkheiñ aiñ.
Kane ka jingpynbeit ka long hadien ba ki la dep ban ïa rai lang ha kine ki sngi ba la dep ha ryngkat ka jingïadon bynta lang naduh ka tnad kakoit kakhiah bad ruh lyngba jong ka Districts Administration kaba ki la dep ban ïa shong lyngba da ka jingïamynjur lang da ka ophis jong ka Deputy Commissioner, South West khasi Hills District ha kaba ka nongrim ka long ba ki paidbah kin bud pyrkhing bha ïa ka jingdeng mask, ka jinglehkhuid da kaba thet ïa ki kti manla ka por bad kaba pynïajngai para briew ne Social Distancing ha kaba kine ki dei ki mat ba hakhmat eh ba ki kum ki paidbah nongshong dukan ne ki nongwan ïew ki dei ban leh.
Ha ka ka jingïalang la ïadon long u Sector ophisar u bah Benteen Kharkongngor, u bah L. Shangdiar Chairman ka Mawkyrwat Market Covid-19 Management Committee, u bah R.R. Lyngkhoi, Myntri shnong Mawkyrwat bad kiwei kiwei de ki riew rangbah kiba dei ki dkhot jong ka ophis u Manager Sankur. Ha kaba ha kane ka jingïalang la ïa rai ban pynïaid thymmai ïa ki ki kyndon ba kham tyngeh ïa ki nongshong dukan bad ruh ïa ki nongwan ïew hapoh ka ïew Mawkyrwat da kaba buh ruh haduh 22 tylli ki kyndon trei kam hapoh ïew.
Ki kyndon ba ka Mawkyrwat Market Covid-19 Management Committee ka la dep ban buh ki long: Baroh ki nongshong dukan bad ki nongwan ïew Mawkyrwat ki dei ban sait ïa ki kti ha ki jaka ba la buh lypa hapoh ïew, ki nongshong dukan ki dei ban pynbeit bha ïa ka jingpynïajngai iwei na iwei pat (Social Distancing) bad ki nongwan thied mar ki dei ban ïa ïeng jngai iwei na iwei pat kata ka jingïa jngai iwei na iwei pat kan long 5 phut ei ei, ki nongshong dukan bad ki nongwan ïew kim dei ban ïa khublei kti lane ban ïa kdup.
Baroh ki nongshong dukan bad ki paidbah nongwan ïew ki dei ban deng ïa ki Mask ban tap bha ïa ka khmut bad ka shyntur, Ïa ki bym deng mask, la ka long ki nongshong dukan ne ki nongwan ïew yn daiñ kuna (fine) T.100 tyngka ïa ki nongshong dukan bad T. 50 tyngka ïa ki nongwan ïew.
Ki nongshong dukan kim dei shuh ban pyndonkam plastik ban song ïa ki mar ba die hynrei ban pyndonkam da ki pla kot, ki sla bad kiwei kiwei, ki nongwan ïew ki dei ban rah la ka jong ka pla na ïing, ki nongwan thied jingthied kim dei ban neh slew ha ka juh ka jaka khnang ban lait na ka jingsaphriang na u khñiang jingpang.
Ki nongshong dukan ki dei ban don la ka dusbin ban buh ïa ki ñiut kiba mih na ki dukan bad ïa ki dusbin dei ban buh hapoh dukan ym dei shabar, ki nongwan ïew kim dei ban bret pathar ïa ki snep soh, ki sla, ki plastic bad kiwei kiwei ki ñiut hapoh ïew, ki nongshong dukan bad ki nongwan ïew kim dei ban die bad dih kiad, duma, drok bad kiwei kiwei ki jingdih basniew.
Ïa ki ñiut na ki dusbin dei ban leit bret ha ka jaka pynlangñiut shi por jong ka Sankur bad ym dei ban bret pathar sha rud sha kiar, ki nongshong dukan ki dei ban pynkhuid ïa ka rud ka kiar jong ka dukan shwa ban khang ne pile ïa ka. Ki nongshong dukan bad ki nongwan ïew kim dei ban biah hapoh ïew khnang ban wanrah ïa ka jingkhuid jingsuba.
La khang pyrshah ïa baroh ki nongshong dukan ba kim dei ban pynmih tam la ki miej, ki ben bad kiwei kiwei shabar na ka dukan, ki nongshong dukan bad ki paidbah baroh ki dei ban burom ïa ka por ban plie bad khang ïa ki dukan jong ki katkum ka hukum ba la pynmih da ka Office jong ka Deputy Commissioner South West Khasi Hills District na ka por sha ka por.
Ki nongdie dohmasi, dohsniang, dohsyiar bad dohkha ki dei ban sait bha ïa ki dukan ki rud ki kiar bad ym dei ban pynjaw snam hapoh madan. Ki nongdie doh ki dei ban sait pynkhuid lypa ia ka doh shwa ban wanrah hapoh ïew. Ki nongdie doh ki dei ban da tap bha ïa ki doh hapoh dukan da ki musari khnang ban lait na ka jingboi skaiñ.
Ki nongdie sha ki dei ban bthah ïa ki nongwan thied jingbam ban ym bret pathar ïa ki jingsong jingbam bad pela hynrei ki dei ban thep ha ki dusbin ba phi la buh ha dukan. Ki nongkhapsñiuh kumba la ïakut ha ka meeting kaba la long ha ka 24 tarik Jylliew, 2020 ha Multipurpose Hall jong ka D.C. Office ban bud ïa ki kyndon kumba la pynmih ïa ka hukum da ka Deputy Commissioner South West Khasi Hills District kaba No.SWK/POL-35/pt-1/2020/65 dated Mawkyrwat 22 tarik Jylliew, 2020.
Kumba la pynmih ïa ka hukum da ki bor ka aiñ la khang pyrshah ïa ki khynnah kiba hapoh 10 snem, kiba armet bad kiba la palat 60 snem ban wan sha ïew. Kino kino kiba ïaleh pyrshah ïa kitei ki kyndon haneng, ka Mawkyrwat Market Covid-19 Management Committee ka kan pynshitom katkum ba shong ka aiñ.