Press "Enter" to skip to content

Noh synñiang ka FKJGP da ki top sintex ha Ïew Dombah, Sakwang

Mawkyrwat, Naitung 31: Ka Federation of Khasi Jaiñtia & Garo’s People (FKJGP) jong ka Sakwang Unit ha ryngkat ka FKJGP jong ka Mawkyrwat Circle lyngba u bah Borbanjop Wahlang ka la ïoh ban noh synñiang da ki ar tylli ki syntex, ki sanitizer bad ki sabon na ka bynta ban pyndonkam ki nongwan ha Ïew Dombah ha Shnong Sakwang.
Shwa kata, la ïoh ba pynlong ka jingïalang ba lyngkot ha kaba la pynïaid da u bah Tebarsing Lyngkhoi, President FKJGP Sakwang Unit bad uba bat ruh kum u Sports Secretary FKJGP South West Khasi Hills District bad la pynbud ruh da ka jingkren pdiang sngewbha na ka bynta baroh kiba ïadonlang ha kane ka sngi da u bah Khlurshai Ramsiej ha kaba u kongsan ha kane ka u long u bah Borbanjop Wahlang uba long President jong ka seng FKJGP Circle Mawkyrwat.
Haba kren kum u kongsan ha kane ka sngi, u bah Borbanjop Wahlang ula kyntu ïa ki paidbah nongshong shnong jong ka shnong Sakwang ba haba ki ïoh ïa kine ki jingïarap ki dei ban pyndonkam hok ymdei ban pynjot pynpra namar ka jingmyntoi ka dei lang baroh namar kum ka seng FKJGP ka la noh synñiang ïa kine ki syntex, ki sanitizer bad ki sabon khnang ba kan long kum shibynta ban ïada ne ba ki paidbah kin ïalehkhuid ïa lade bad ban nym ailad ba une u khñiang jingpang u Covid-19 un saphriang.
Ula ong ruh ba kum ka seng ka ïohi ïa ki jingdonkam jong ki paidbah ha kaba ki la pyrshang ban leh ïa kaba bha tam na ka bynta ka jaidbynriew, watla ka long ha i bor barit jong ki.
Ha kajuh ka por ula kyntu ruh ïa ki bor shnong ba ki dei ban peitngor bha da kaba buh jingkheiñ bin-pa-bin ïa ki nongleit nongwan, ki nongshong dukan da kaba shim kyrteng ïa ki briew kiba wan thied jingthied ha ki dukan ha manla ki dukan shnong ne wat ha ki jaka ïew ruh khnang ba lada jia ba ki don kiba ïoh ïa une u khñiang jingpang kan pynsuk ïa kiba dei bor ba peit kum ka tnad kakoit ka khiah ban buddien ïa kiba kum kita ki briew.
Ula kyntu ruh ïa ki para dkhot ba haba ki trei ïa kano kano ka kam, kin ïatreilang ruh bad ki bor shnong khnang ba ki briew kin ïohi bad ban don ka jingïasngewthuh jingmut lang ba kan long ka jingmyntoi ïa ki paidbah ym tang ïa ka mala de shimet.
Haba kren na ka liang u Myntri ka shnong Sakwang u bah S. Kharjahrin ula ai ka jingkhublei ïa ka FKJGP ha kaba kum ka seng ka ïohi ïa ki jingdonkam jong ki paidbah ha kum kane ka por. Ula ai ruh ka jingkitbok kit rwiang ïa ka FKJGP ba kan nang shakri ïa ka jaitbynriew bad im ha ka jingim ba ki briew kin don ka mynsiem shaniah.
Haba kren ha kaba ïa dei bad une u khñiang jingpang COVID-19 uba ka Ri India bad ki Ri ha ka pyrthei ki don hapdeng ka jingïaleh kaba jur, u Myntri shnong ula ong, “une u khñiang jingpang u dei uwei u jait jingpang ne u jait khñiang uba sarong bha, haba ymdon leit shaw ïa u, u ruh un nym wan”.
Kumta ula kyntu ba kum ki paidbah ha kaba kum kane ka por ki dei ban long kiba husiar da kaba bud pyrkhing bha ïa ki kyndon ba la ai da ka sorkar bad ai ba une u khñiang jingpang u sah hi ha ka jaka ba u shong bad ba un ïap hi ha ka jaka ba u don.
Kum ban shu kdew ba ka South West Khasi Hills District ka dang dei kawei na pdeng ki District kaba bym pat don satia ka jingpang COVID-19.