Press "Enter" to skip to content

Pang COVID-19 sa uwei u doktor ka Bethany Hospital bad ar ngut ki nongpang

Shillong, Naitung, 31: Sa uwei u doktor jong ka Bethany Hospital u la ngat ha ka jingpang COVID-19 hadien ba la pynthikna lyngba ka jingleh test mynta ka sngi Thohdieng.
Ha ka jingïakren bad ki lad pathai khubor mynta ka sngi Thohdieng u DHS (MI) u Dr. Aman War u la ïathuh ba une u doktor u dei uwei napdeng ki 20 ngut kiba la ngat ha ka jingpang COVID-19 hadien ba ka kaiphod na ka jingleh Test ka pynpaw ba u long Positive.
“Nalor une doktor, ki don pat ar angut ki nongpang kiba shah sumar ha kane ka Hospital ki dei kiba la ngat ha une u khñiang jingpang ha kaba ki don ïa ka jingpang shitmet, jyrhoh bad tlot ka met.
Kum ban shu kdew hangne, u Dr. John Sailo Ryntathiang uba long u Director bad u trai jong ka Bethany Hospital, Shillong u dei uba nongshong shnong banyngkong eh ha ka jylla ban ngat ha ka jingpang ha ka 13 tarik, Ïaiong, 2020 bad khladnoh na kane ka sla pyrthei ha ka 15 tarik, Ïaiong, 2020.
Hynriew ngut na ki bahaïing hasem jong u ruh la lap ba ki la ngat ha kane ka jingpang bad mynta ki la ïoh biang ïa ka jingkoit jingkhiah.
Shuh shuh u Dr. War ula ïathuh ba iwei na ki nongtrei ka Koit ka Khiah iba la ngat ha kane ka jingpang i dei iba trei ha RP Chest Hospital, Shillong bad iwei pat i dei iba trei ha NEIGRIHMS, Hospital.
U la ïathuh shuh shuh ba uwei uba pang COVID-19 na South Garo Hills mynta ka sngi Thohdieng u dei uba ïabit na u hynmen uwei uba wanphai na Bangalore ha ka 23 tarik mynta u bnai.
U Dr. War u la iathuh ba une u doctor u dei uba saw uba la Test Positive ha Meghalaya hadien ba lai ngut ki Doctor kynthup ruh ia u Dr John L Sailo Ryntathiang uba la khladnoh u la ngat ha kane ka jingpang.