Press "Enter" to skip to content

Pynap ka DC ïa ki rukom pyn-shitom ïa ki Nongleit Ïing ïathoh

Shillong, Naitung 31: Ka Deputy Commissioner ka East Khasi Hills Kong Matsiewdor War Nongbri hynne ka sngi thohdieng kala pyntip ba kan sa pynshitom ïa ki 39 ngut ki briew ba leit sha ka Ïingïathoh ha Khanapara hadien ka jingtohkit jong ki Pulit namar ba kila pynkheiñ ïa kiba bun ki hukum bala pynjari da ka Sorkar ban tehlakam ïa ka khlam COVID-19.
“Ka jingtohkit shuh shuh ïa kane ka kam ka dang ïaid mynta bad la tohkit ïa ka da u Superintendent of Police kat kum ka ejahar bala mudui hynne ka sngi. Ngin hap ban ap ïa ka kaiphod jong ka jigntohkit bad ngin sa shim ïa ka rai pynshitom” ong i Kong Matsiewdor haba iakren bad ki nongthoh khubor.
Ki bor pynïaid District ka East Khasi Hills kala ujor hynne ka sngi ïa ka ejahar bynrap  sa ïa 4 ngut ki briew kiba leit sha ka Ïingïathoh ha Greenwood Resort, Assam.
“Kane ka ejahar bynrap ka long ïa ki 4 ngut ki briew. Mynta kila don haduh 39 ngut ki briew ïa kiba ngi la ujor ejahar” ila ong.
Haba kylli, ka Deputy Commissioner kala ong ka mat ba kongsan eh jong kane ka ejahar ka long ba kine ki briew kila pynkheiñ ïa kiba bun ki kyndon bad ki hukum jong ka Sorkar Jylla.
“Kawei ka long ba ki nongleit ïing ïathoh ki don haduh 39 ngut katba ka pass pat bala ai ka long tang ïa 5 ngut ki briew. Ïa ka car pass la ai tang sha ki 5 ngut ki briew hynrei haduh 11 tylli ki kali kila leit bad kila wan phai nalor kata ym shym la ai pass ruh iano iano ruh ba kin wan phai. Ki 5 tylli ki pass bala ai ka dei na ka bynta ki 5 ngut ba kin leit ym ba kin wan phai” ila ong.
Kat kum ka jingong ka DC, ki don shibun kiei kiei kiba kine ki briew kila pynkheiñ ïa ki jingpynjari, ki kyndon curfew bad ruh kiwei kiwei ki hukum jong ka Sorkar bala pynjari namar ka khlam.
Hadienn ka jingtohkit ïa kane ka jingjia, la shem ba ki don haduh 47 ngut ki briew kiba leit sha ka Ïing ïathoh ha Assam ba kynthup ïa 39 ngut na East Khasi Hills bad 8 ngut na Ri-Bhoi District.
Kine kiba na Ri-Bhoi ruh la shem ba kila pynkheiñ ïa ki kyndon iada COVID-19 da kaba kiar khnang ban ïaid lyngba ka Coronavirus Screening & Testign Centre ha Byrnihat hadien ba ki wan phai na Shillong sha Assam.
Lah ban kdew hangne ba haduh 23 ngut ki breiw kila ïoh ïa ka jingpang COVID na uwei u briew ba leit sha kane ka Ïing ïathoh ha Greenwood Resort myn ha ka 27 tarik Jylliew bad ha ka jingkhawai ha Shillong myn ha ka 2 tarik u Naitung.