Press "Enter" to skip to content

Shim khia ka Sorkar phah test ‘swine fever’ sha Delhi: Dy CM

Sar sa ka khlam sniang ha Lamin ïap palat 170 tylli

Shillong, Naitung 31 : Ka khlam sniang ka la sar ha ka shnong khappud Meghalaya bad ka Bangladesh kata ha ka shong Lamin, Amlarem Sub Division, West Jaintia Hills, kaba la tip kum ka “ Swine Fever”. Na ka liang ka tnad Veterinary jongka sorkar jylla ka la phah ïa ki doktor mrad sha katei ka shnong ban leit sot nongmuna ne sample bad ïa kitei ki nongmuna la phah sha Khanapara bad kumjuh ruh sha ka Ministry of Veterinary jongka sorkar pdeng mynta ka sngi, ïathuh u Symbud Myntri Rangbah ka jylla u bah Prestone Tynsong.
Haba ïakren bad u nongthoh khubor, u bah Prestone u la ong “ Haduh mynta ngim pat lah ban pynshisha la ka dei ka African Swine Flu ne kaei hynrei la shu tip beit kum kata ka Swine Fever namar yn lah ban pynshisha ïa kane ka jingpang dei tad haduh ban da ïoh ïa ka report na Delhi. Kat haduh mynta ki la don bun ki sniang kiba la iap bad ka tnad Veterinary jongka jylla ka dang lum jingtip tangba ïa ki sample la shim haduh hynriew tylli ban phah sha Delhi bad sha Khanapara”.
Ula ïathuh ba kane ka khlam ka la sdang naduh u bnai ba la dep bad bteng haduh mynta bad na ka liang ka tnad Veterinary ka la phah ïa ki briew jongka ban don sha katei ka thaiñ ban ai jingïarap ïa ki paidbah bad kumjuh ruh ban ai jinghikai ïa ki kumno ba kin sumar ïa kane ka jingpang khlam ki sniang.
Shuh shuh la ïathuh ba kane ka jingpang ka dei beit kaba ïabit tang para sniang bad kam dei kaba pur sha ki briew kumta ki briew kim dei ban sheptieng. Nalor kane la kyntu jur ruh ïa ki paidbah ba haba ki shet ïa ka doh sniang ki dei ban da shet ih bha la kumno kumno ruh 45 minit kam dei ban duna.
“ Nga la bthah ïa ki bor pyniaid ka tnad Animal Husbandry and Veterinary ba kin bthah ba ka District Animal Husbandry and Veterinary Officer ka dei ban don 24×7 ha ka District bad ban hiar ruh sha katei ka jaka ban peit bad bud dien kumno ban ïarap bad hikai ïa ki paidbah ba kin sumar ïa ki sniang jongki”.
Katba na kawei pat ka tyllong khubor ka ïathuh ba naduh ba sdang kane ka khlam ha u bnai Jylliew kat haduh mynta ki sniang kiba la iap tang ha Lamin bad ki jaka ba marjan ki la palat ïa ka 170 tylli bad ïa baroh kine ki sniang ba la iap ruh la tep beit ha ki thliew kiba la tih jylliew bha khnang ba kane ka khlam kan ym ïoh ban pur sha kiwei ki shnong.
La ïathuh ba ki la don ki shnong kiba marjan kiba kane ka khlam ka la sdang ban pur kata kum ka Sohkha bad kiwei kiwei kiba marjan.
Na ka liang u Director jongka Animals Husbandry bad Veterinary u la pynbna ïa ka shnong Lamin kum ka shnong ba shah ktah tam ha kane ka jingpang ne ka Infected Zone katba ki shnong ba marjan kum ka Sohkha Shnong, Sohkha Mission,Sohkha Model, Sohkha Phlang, Kudeng Thymmai, Nongtalang, Darang bad Dawkim kum ki Surveillance Zone.