Press "Enter" to skip to content

Syrtok ki paidbah Warsanlyngdoh ba sahkut ka jingpyntrei surok PMGSY

Nongstoiñ, Naitung 31: Ki paidbah nongshong shnong jong kumba 9 tylli ei ei ki shnong ba don ha ka thaiñ Warsanlyngdoh, ki la don hapdeng ka jingeh kaba jur namar ka jinglong jingman jong ka surok ka la sniew eh kaba la ktah shibun eh ia ka leit ka wan bad ka kit ka bah jong ki.
U Bah M.Marthong haba pyntip sha u nongthoh khubor, u la ong ba ka surok PMGSY ba 5 kilometer na Umjaraiñ sha Mawphanrang, ka la sniew palat khamtam ha kum kane ka por ka aiom jong u slap. U la ïathuh ba ki kali laiñ ba ju kit ïa ki paidbah ruh ki la shem shitom shisha ban ïaid namar man ki jaka la dap satang ki thliew suda.
U la ong ba ki kali rit lei lei kim long ban ïaid bad kane ka ktah ïa kito kiba donkam ban leit sha ki jaka sumar, ban leit shim dawai bad kiwei kiwei. U la ïathuh ba ki paidbah ki la ïohi la bun snem ba la pynieng ïa ka sign board, ha kaba la thoh shai ba yn sa siang rong ruh ïa kane ka surok ba 5 kilometer.
“Hynrei sngewsih pat ba u Contractor tad haduh u bnai Kyllalyngkot mynta u snem haduh mynta, u dang siang maw malu mala tang kumba 1 kilometer ei ei. ka jingpynieng sign board da ki bun bun snem imat ka dei tang ka jingpynbiej ïa ki paidbah ba kin sa ïoh surok rong, katba ka kam khlem poi shano shano ruh”, u la ong da kaba pynpaw ka jingsngew bynniaw.
Kumta, na ka liang ki paidbah ki kyntu ïa ki bor District, ïa ka tnad ba dei peit ïa kane ka surok bad ïa u nongmihkhmat, ban phai sha kane ka bynta, da kaba kin tuklar bad bthah ruh ïa u Contractor ba u dei ban pyndep noh kloi katba lah, khnang ban ïarap ïa ki paidbah ha ka leit ka wan.
U la ong ruh ba lada ka sorkar kam shimkhia kum ïa kine ki kam, kam don jingmut ba kan shu kop ba ka dei ka sorkar kaba kwah ïa ka roi ka par bad ban kyntiew ïa ki paidbah nongkyndong ka Jylla. Ha ki nongkyndong hi, ka surok ka long kum u budlum ïa ka roi ka par, ym don surok ym don budlum.
Ha kawei pat ka khubor, Ka Seng Federation of Khasi Jaiñtia & Garo People (FKJGP) Lai Lyngdoh Area Unit, ka kyntu ïa u Executive Engineer ba un maramot pynbha noh ïa ka surok na Nongstoiñ sha Kynroh namar ba ka la sniew palat.
Kumba long mynta katei ka surok ka la sniew palat shi katdei eh bad khamtam ha ka bynta ba kiew ïa ka surok marjan ka District Jail, kat haduh ba la i sangsot ïa ki kali bad ym I dei shuh ba ka dei ka surok PWD Road jong ka Sorkar Meghalaya. Kumta ka seng ka kyrpad ba ka ophis kan peit ban pynbha katba lah khnang ba ki kali kin ym jynjar bad khamtam kiba pang ba shitom.