Press "Enter" to skip to content

Hukum ka Committee on Empowerment of Women ban thungkam biang ïa i ASHA Nongsier

Nongpoh: Ka Committee on Empowerment of Women (CoEW) ka la hukum ïa ka DMHO jong ka Ri Bhoi District ban thungkam biang mardor ïa i ASHA jong ka Shnong Umsier, i Kong Imshida Thangkhiew.
Ka Committee ba la khlieh da i Kong Ampareen Lyngdoh, MLA ka la khot hajir ïa ki ophisar jong ka Ri Bhoi District ha ka sngi ba ar ha ophis Deputy Commissioner, Nongpoh ba kin pynshai halor ka jingshah weng kam jubor ine i longkmie ha ka Dorbar Shnong.
Ha kane ka jingkhot hajir, ka Committee ka la ïoh jingtip lyngba ka jingtohkit ki bor synshar kane ka District ba ine i ASHA im shym la leh kano kano ka kam kaba bakla, hynrei i la pyndep ïa la ka jong ka kamram kum ka nongtrei ka koit ka khiah ban btin lynti ïa kawei ka samla kaba la shah leh beijot ha ki riew runar.
“Ngi la bthah ïa I DMHO jong ka Ri Bhoi ban pynmih hukum ban thungkam biang mardor ïa ine i ASHA”, la ong i Kong Ampareen Lyngdoh, Chairperson kane ka Committee.
U Bah HM Shangpliang, u dkhot jong kane ka Committee, u la ong ba lasha ka sngi, i DHMO ka RI Bhoi idei ban pynpoi ïa ka hukum ba la thungkam biang ïa i Kong Imshida kum ka ASHA jong ka Shnong Nongsier.
Lah ban kdew hangne ba i Kong Imshida, i la shah weng kam jubor ha ka Dorbar Shnong Nongsier tang namar ba i la ïarap ïa kawei ka samla kaba don jingthut ha ki dkhot met, kaba la shah leh beijot ha uwei u riew runar, u ba kyrteng u Lurstarwel Rani.