Press "Enter" to skip to content

Ieh u Bah Samlin ha ka HSPDP halor ka ïa bhah kam Myntri bad u Bah Renikton

Shillong, Nailur 15: U Bah Samlin Malngiang, MLA ka seng sainpyrthei Hill State People’s Democratic Party (HSPDP) na Sohiong Constituency, Myntri ha ka Sorkar Meghalaya Demo cratic Alliance u la pynpaw ba u ieh ha ka jingïapynbeit ka Party halor ka kam kaba ïa dei bad ka jingbhah kam Myntri hapdeng jong u bad u Bah Renikton Lyngdoh Tongkhar, MLA ka HSPDP na Mawkyrwat Constituency.
Hynrei u la pynshai ba naduh kaba sdang kam shym la don ka jingïakren lypa ne kano kano ka soskular ban pynbeit ban bate ïa ka shuki Myntri mar shiteng ka samoi hapdeng kine ki ar ngut ki MLA na ka Party.
“Kam shym la don satia ka jingïakut lypa ban shim mar shiteng samoi ïa ka shuki Myntri ha ka Sorkar, namar ha ka por ba nga shim smai kum u Myntri ha ka sorkar MDA, ka Party kam pat don satia ïa u President”, la ong u Bah Samlin.
“Hadien ba la iehnoh kam u bah Ardent M Basaïawmoit ka Party ka don ïa u President. Hynrei hadien ba la dep shim smai kum u Myntri ka la don ka jingïakren tang da ka ktien na ka liang u bah Renikton uba la ong ban ailad lang ban ïoh bynta kum u Myntri Sorkar”, la ong u Bah Samlin.
“Ka Party ka la jop tang ar ngut ki MLA bad baroh ar ngut ngi la leit shwa sha u President barim ban pan jingmut ïa ki sienjam bad na ka liang u bah Ardent, ha katei ka por u la ong ba dei ban leit beit bad ka UDP ha ka Regional Democratic Alliance (RDA)”, u la ïathuh.
“Lada ba ka RDA ( ka kynhun ïa treilang ka HSPDP bad UDP) kan don ha ka Sorkar, u Bah Ardent u la ong ba ngan shimti ïa ka kam Myntri namar ba nga la jop shwa ïa ka elekshon MDC ha u snem 2016”, u la ïathuh..
“Ka kam ban ïa kylliang Myntri kam dei satia kaba la wanrah da ka party naduh ba sdang bad mynta ruh ngam sngew eiei lada ka party ka tuklar bad nga ieh ha ka jingstad ka Party ban shim ïa ka rai”, u la ong..
“Ha ka por ba u President ba mynta, Bah K P Pangnïang nga la leit ban ïa kynduh halor katei ka mat bad kum u MLA ka Party nga la pynsngew ïa ka nongrim jong nga bad nga pdiang sngewbha ïa ka jingpynbeit ka Party da ka lynti kaba dei”, u la ong.
Ha kawei pat ka liang, u la ong ba u la dep rai lypa bad pan por na ka Party ban pyndep shwa ïa ki kam ba sahkut jong ki tnad treikam kiba u bat kum u Myntri. “U Bah Renikton lada u dei u briew uba don ïa ka nongrim u dei ban sngewthuh ïa ka jingpan por jong nga”, u la ong.