Press "Enter" to skip to content

Ki Sengbhalang pyrshah ïa ka Sorkar MDA

Babu Kular Khongjirem

Ka khubor ban shna lynti Rel ha Meghalaya ka la mih bad lynguh hi pum ha ki kotkhubor manla ka sngi. Ki sengbhalang bapher bapher ki la pyrshah beit triang ban wan ka lynti Rel sha ka ri Khasi-Jaiñtia (namar sha Garo Hills ka la poi) namarba ka sorkar kam pat lah satia ban pynbiang ïa ki aiñ ki kanun ban khanglad ïa ka jingrung pathar ki mynder-ri sha ri jong ngi.
Lada ka Sorkar kam pat lah ban pyntreikam ne pynurlong ïa ka ILP, ki Entry and Exit Point bad kiwei kiwei, ka lynti
Rel kan kylla long pynban ka jingtim ïa ka jaitbynriew ritpaid jong ngi namar ngi lah ban shah tyllep noh ha kine ki jaitbynriew heh paid bad ngin sa jah noh ha ki ar-lai pateng bynriew ki ban sa wan. Hooid,ka lynti Rel kan long ruh ka jingkyrkhu bad ka jingmyntoi ïa ka jingkiew ka roi ka par, ka khaïi ka pateng hynrei lada kata ka jingroi kan pynngam bad pyntroiñ pynban ïa ka ri bad ka jaitbynriew jong ngi, ki sengbhalang bapher bapher kin ym ailad satia ïa ka Sorkar ba kan wanrah ïa kata ka lynti Rel ha ri jong ngi.
Ka MDA kum ka Sorkar khleh khawlang (Coalition Govt) ha Meghalaya ka la ktha khlieh bad king janor bha ban ai rai ïa ka lynti Rel ha ri jong ngi. Ki paralok (political partners) jong kane ka sorkar ki la ïa pyni bad ïa batai ïa la ki jong ki jong ki jingshem bad jingsngew jong ki la kumba batai ki matlah Hindustan hyndai shaphang u Hati.
Ka UDP ka kwah Rel tang ha Khanapara ne Byrnihat ban kit mar kit mata, ym dei shaduh Shillong. Ka BJP pat kum ka National Party, ka kwah ban wanrah syndon ïa ka lynti rel haduh Shillong ban kham suk ka kit ka bah bad ka khaii ka pateng.
Ka PDF pat ka la kren shai kumba ong ki sengbhalang ba ym bit da leilei ruh em ban wanrah ïa ka lynti Rel ha ri jong ngi la ka dei tang ka Rel kitmar ha Khanapara/Byrnihat kumba kwah ka UDP ne haduh Shillong kumba kwah ka BJP lymda ka Sorkar kan pyntreikam shwa ïa ki aiñ khang mynder kiba khlaiñ kum ka ILP, Entry and Exit Points bad kiwei kiwei.
Ka NPP kum ka Seng Saiñpyrthei kaba king ïa ka lieng MDA kan shitom bha ban khawa ïa ka lieng MDA. Lada kan king shakhmat ruh ym long, ban ran shadien ruh ka long kaba eh bha. Dei hangne kein ba ka NPP ka don mynta ha ka jinglong kaba ‘shong ruh jhieh, ieng ruh kynduh’.
Lada jia ba kane ka sorkar MDA ka ïaid shakhmat kumba kwah ka UDP,BJP, ka jingïakhih ki sengbhalang ka la ap lypa hakhmat jingkhang. Lada ka NPP kam sngap pat ïa ka UDP, BJP ne PDF ka Lieng MDA ka lah ban ïalam pynban sha ka jingngam noh kane ka lieng MDA. Ka jingïakawang ktieh bad ka thma ktien (war of words) hapdeng ka NPP bad ka BJP halor ka jingpyndonkam bakla ka Executive Committee ba la ïalam da ka NPP ha baroh ar tylli ki District Council (GHADC bad JHADC) ruh kaba i bang bad i shyrkhei bha bad lada kim lah ban ïatem noh kloi (compromise). Ki sngi jong ka jingngam noh ka Lieng MDA ka la nangjan katba nang mih ki sngi ki bnai.