Press "Enter" to skip to content

Kyntu u Bah Dino ïa ka UNO ban ithuh noh ïa ka ktien Khasi

Shillong, Nailur, 15: Ka Dorbar Bah kaba 45 jong ka United Nations Human Rights Council kaba la sdang hynnin ka lah sngi u Blei ha UN headquarter, Geneva, Switzerland haduh 193 tylli ki ri jong ka pyrthei kiba long ki dkhot jong ka UNO, ki riewshemphang kiba la jied kyrpang (Independent Expert), ki nongmikhmat na ki Sengbhalang na kylleng ka pyrthei kiba la ïoh ïa ka jingithuh na ka ECOSOC ki la kynduh saw sien shisnem ban ïathir ïatai ïa ki mat kiba ïadei bad ka jingshah iuhroit ïa Hok Longbriew Manbriew ha ki Ri ka pyrthei.
U Chairman jong ka Meghalaya Peoples Human Rights Council (MPHRC) u Bah Dino D.G. Dympep uba long uwei na ki riew shemphang halor ka hok Longbriew Manbriew bad uba la dep pyntbit ïa lade na ka United Nation International Training and Research (UNITAR) u la long uwei na ki riewkhmat jong ka Jylla Meghalaya uba la ju leit ban ïashim bynta ha kane ki Dorbar Bah jong ka UN ban mihkhmat ia ka jaitbynriew Hynñiewtrep bad ïa ka Ri India ha kine ki snem kiba la leit noh.
Mynta u snem namar ka jingkynrei jong ka khlam jingpang COVID-19 ïa kane ka Dorbar la hap ban pynlong noh lyngba ka Tele Video Conference bad ka ophis jong UN High Commissioner for Human Rights (OHCHR) kaba don ha Nongbah Geneva, Switzerland, ka la jied biang sa shisien ïa u Chairman jong ka MPHRC u Bah Dino D.G. Dympep ba un ïa shim bynta biang ha kane ka Dorbar bad ki dkhot jong ki Ri na kylleng ka pyrthei. Ïa kane ka Dorbar yn pynïaid da ka ka Elisabeth Tichy-Fisslberger kaba dei ka UN Ambassador jong ka Ri Austria bad ka President kaba mynta jong ka UN Human Rights Council.
Ha kane ka Dorbar, u Bah Dino D.G.Dympep un sa shim bynta ha ka General Debate bad ka Interactive Dialogue halor ki mat ïatai bapher bapher kiba la dep pynkhreh da ka Human Rights Council Secretariat.
U Bah Dympep un sa long uwei na ki riewshemphang ban sa shim bynta ha ka jingïathir ïatai ha ka Kaiphod ba shisien shisnem halor ka jingshah thombor jong ki paid trai ri trai Muluk (Indigenous Peoples) ha kylleng ka pyrthei ïa kaba yn sa leit rah hakhmat kane ka Dorbar da u UN Special Rapportuer u Francisco Cali Tzay uba dei na ka Ri Geutemala.
Kawei na ki mat kiba hakhmat eh kiba u Bah Dympep u ladep pynkhreh ka long ban ïai kyntu ïa ka Dorbar UN Human Rights Council ba ka dei ban kyrpad ïa ki Ri long dkhot jong ka UNO khamtam eh ïa ka Ri India, ban ithuh noh kham kloi ïa ki Ktien jong ki paid trai ri trai muluk jong ka pyrthei khamtam eh ïa ka ktien Khasi bad Garo ba yn lah ban pynrung noh kham kloi ha ka Khyrnit kaba Phra jong ka Riti Synshar jong ka Ri India. Kane ka Dorbar kan kut noh ha ka 6 Tarik Risaw 2020.