Press "Enter" to skip to content

Na u Lat, dawa tohkit u Dr Mukul ïa ki kam bamsap ha GHADC

Dawa da ka synshar Administrator mardor
Shillong, Nailur 15 : U Myntri Rangbah ba rim ka jylla uba long mynta u Nongïalam ka Liang Pyrshah (NLP) ha Iing Dorbar Thawaiñ ka jylla, Dr. Mukul Sangma ha ka sngi Ba-ar u la ujor syndon shaduh u Lat ka jylla, u Satya Pal Malik ban dawa tohkit halor ka jyrsieh bamsap ha Garo Hills Autonomous District Council.
Ha kajuh ka por u la dawa ruh ba dei ban pynjari mardor da ka synshar Administrator khnang ban ailad ïa ka jingtohkit kaba khuid bad ka bym shah liang.
Ha katei ka jingujor, u Dr. Mukul u la kdew ba ka don ka bamsap ba shyrkhei bha ha ki district council khamtam eh ha GHADC kumba la sei pyrthei dang shen da ka BJP Meghalaya hadien ba ki la ïoh ïa ki jingtip lyngba ka RTI.
“Katei ka jingkynnoh kadei kaba la jur bha bad ka paw ba ka don ka jingpyndonkam bakla ba shyrkhei bha da ki klur tyngka ka pisa paidbah kaba dei na ka bynta ki kam pynroi ba la mang sha ka GHADC ban kyntiew ïa ki jaka ba dang sahdien bad ruh na ka bynta ka jingbit jingbiang jong ki nongshong shnong riewlum jongngi,” ong u Dr. Mukul ha katei ka jingujor.
Shuh shuh u la ong ruh ba ka jingpyndonkam bakla ïa ka pisa ha GHADC ka la wanrah ïa ka jingjynjar kaba haduh katta katta ïa ki nongtrei jong ka Council kiba khlem ïoh shuh shuh ïa ka tulop jong ki mynta la jan ar snem ei ei. U ong ruh ba katei ka kam bamsap ka la nang pyntlor shuh shuh ïa ka jingtreikam jong ki district council bad ïa ka nongrim jong ka.
Shuh shuh u la dawa ruh ba halor kitei ki jinglap baroh bad khnang ban khanglad ban pynjah ïa ki sakhi sabut baroh kiba ïadei bad katei ka suba bamsap da kito kiba don ha ka bor, u la dawa ba dei ban thaw da ka kynhun tohkit mardor bad ban pyntreikam ruh da ka kyndon jong ka Para 16 (2) jong ka Khyrnit kaba Hynriew jong ka Riti Synshar jong ka Ri. U la ong ruh ba lada pynslem ïa kane, kan ailad ïa kito ki briew kiba donkti ha katei ka suba bamsap ba kin ïaid laitluid bad kan pynshlur shuh shuh ïa ki ha katei ka kam bamsap.