Press "Enter" to skip to content

Plie u Bah A.L Hek ïa ka Woodland WK Hospital kaba don 108 jingthiah ha Sabah Muswang

Jowai, Nailur, 15: U myntri jong ka tnad ka koit ka khiah ka sorkar jylla u bah A.L Hek mynta ka sngi ba ar ula wan ban plie paidbah ïa ka jaka ai jingsumar kaba la tip kum ka ‘Woodland WK Hospital’ ha ka shnong Sabahmuswang West Jaiñtia Hills District kaba jngai tang kumba 7 Km na sor Jowai.
Ha kane ka sngi la wan ban ïadonlang da u Managing Director jong kane ka Hospital u Dr. W. Kharshiing, u MLA ka Jowai ma Wailadmiki Shylla, u Director of Health Services (MI), Dr Aman Warr, U Deputy Commissioner ka WJHD ma Garod L.S.N. Dykes, I.A.S, u ma Brightstar Chyrmang MDC , u Waheh Shnong Sabah Muswang ma Telmi Phawa, u Daloi ka Elaka Jowai ma Puramon Kynjing, ki Doctor, ki Nurse jong ka Hospital bad kiwei de.
La ïathuh ba ïa kane ka jaka ai jingsumar la sdang ban tei naduh u bnai nyngkong jong u snem 2017 ha kaba mynta ka sngi 15 tarik u Nailur, 2020 la lah ban plie noh ïa ka kaba long ka sngi sah kynmaw burom. Ïa kane ka kyrteng ‘Woodland WK Hospital’ la lah ban ïoh tang hapoh 6 bnai ha shwa ban plie ïa ka, la ïathuh u Dr. W. Kharshiing. U Dr. Kharshiiing kum u trai jong ka Hospital ula pynpaw ruh ka jingsngewnguh kaba khraw eh ïa ki nongpyntrei naduh ki Contractor bad kiwei de kiba la trei shitom met bad mynsiem ban pyndep ïa kane ka Hospital ha ka por kaba biang.
Kumba long mynta kane ka Hospital ka la don haduh 108 ki jingthiah bad la buh (install) ruh da ki tiar jong ka juk stad ba mynta kum ki lad jingïada ïa ka mariang na ki jingjakhliah kum ki kynja um kiba mih na kane ka Hospital da kaba yn recycle biang ïa ki, sa ka wei la buh ïa ka Oxygen Generator na ka bynta ban ai jingsumar ïa ki nongpang ha kaba ym donkam shuh ban leit sha kiwei pat ki jaka ai jingsumar.
U Dr Aman Warr ula ong lyngba kane ka jaka ai jingsumar kan ïarap shibun eh ïa ki briew kiba wan shim dawai na kylleng ki bynta jong ka Jaiñtia Hills, da kaba u ong “Kine baroh ki dei ki jingkyrkhu jong U Blei, kumta ym dei ban klet ïa ki jingleh bha jong u”.
La kumno kumno kane ka jaka ai jingsumar ka lah ban ai jingsumar haduh kumba 80 percent ïa ki nongshong shnong jong kane ka thaiñ ong u bah A.L Hek namar kane ka Hospital ka don ruh harud jong u surok National Highway-6 bad kane kan pynsuk shibun ïa ki breiw ban poi sha kane ka jaka sumar.
Ha ka juh ka por u kyntu ïa u Doctor bad ki nongtrei jong ka Hospital baroh ba kin ai ka jingshakri kaba ïa ryngkat ïa baroh lang naduh uba duk haduh uba don ba em. Shuh shuh u kitbok kitrwiang ïa kane ka Hospital ba kan nang ïaid shakhmat ban ai ïa ka jingshakri kaba bha tam ïa ki paidbah ym tang ïa kane ka District hynrei ïa ka jylla hi baroh kawei.
Katba na ka liang u MLA ka thaiñ ma Wailadmiki Shylla haba kren u ong kane ka jingdon jong ka Woodland WK Hospital kan ïarap ban pynïoh kam pynïoh jam ïa ki briew jong ka thaiñ hapdeng jong kane ka por kyrduh kam, u la ai khublei ïa u Dr. W. Kharshiing uba la don ka jingïohi jngai ban seng ïa kane ka jaka sumar hapoh ka District.
Ha kane ka Hospital ki Doctor kiba la don mynta ki kynthup ïa ki Medicine, Pediatrician, Surgery bad ENT. Katba ïa ka Out Patient Department (OPD) kum ka ECG, ki Endoscopy, X-Ray, ki jing test snam ba bun jait (laboratory) ki sdang treikam noh naduh ka 16 tarik mynta u bnai.