Kyntait ki nongïalam ba kyrsum politik ka ABVP

13 January, 2018

Shillong, K’lyngkot, 12: Ka Akhil Bharatiya Vidyarthi Parishad (ABVP) kaba long ka shnat treikam ki samla jong ka Bharatiya Janata Party (BJP) ka la kyntait ba ka donkti ban ïakyrsum ha ka Politik bad kam ruh ba kane ka kynhun ka don 1000 hajar ngut ki dkhot samla ha baroh kawei ka jylla Meghalaya.

U Anil Singh Roka, State Executive Member haba kren bad u nongthoh khubor mynta ka sngi u la ong, ‘ka ABVP kam don jingïadei eiei bad ka saiñpyrthei hynrei ka dei ka kynhun kaba trei na ka bynta ka bha ka miat jong ki samla ha kylleng ki jylla ka ri India.”

U Roka u la ong ba kane ka kynhun ka ju pynlong ïa ki prokram bapher bapher na ka bynta ki samla kum ki jingïakop shut jabieng, ki jingai jinghikai ha ka wadkam wadjam bad kiwei kiwei ki jait ai jinghikai kiba ïadei beit thik tang bad ki samla.

U la kam ruh ba ki don ki dkhot ka ABVP ki bym pat sngewthuh ïa ka tien phira jong ka Seng kaba ieng ban trei tang ka bynta ka jingpynroi ïa ka jingnang jingtip, ka jinglong, bad ka jingïalong kawei.

“Hynrei ki briew kiba peit na shabar ki lah ban pynïasnoh ïa kane ka kynhun jong ngi bad ka saiñpyrthei bad dei kane kaba ngi mad ïa ka jingshah kren, hynrei ngi kren shai ba ngim don jingïadei eiei bad ka saiñpyrthei..

Une u State Executive Member, u la bynrap ruh ba ka ABVP ka pdiang sngewbha ïa kino kino kiba kwah ban long ki dkhot jong ka seng bad haduh mynta kane ka kynhun ka ladep pynrung dkhot ruh kumba shihajar ngut eiei ha kylleng ka jylla Meghalaya.

U Roka, u la kyntu ïa ki samla ka jylla ba kin phaikhmat ruh sha ki kyrtong ïakhun elekshon ki ban wanrah ïa ka roi ka par ha ka Constituency hynrei ym tang ban shu long tang ki nongthep vote ba peit tang ïa ka Party haba la poi ka samoi elekshon.

Mynta ka sngi, ka ABVP ka la rakhe ïa ka National Youth Day programme kaba la long ha RB Anoop Chand School, Police Bazar.

“Ha ka jingsngew jong nga, ki sasmla ki dei ban da peit bad bishar ïa u kyrtong ym ïa ka party. Lada u kyrtong u long uba biang bad uba kloi ban ïatreilang ban kyntiew ïa ki samla ha ka constituency, ki samla ki dei ban phaikhmat sha uta u kyrtong hynrei ym ban peit pat ïa ka Party,” u la ong.

U la ong shuh shuh kumba ka long mynta, ka jinglong jingman ka saiñpyrthei ha kane ka jylla ka long kaba khih phaloh namar ki kyrtong ki ïa ryngkoh na kawei sha kawei pat ka Seng.

Haba kylli kaei ka jingeh ba ki samla ki mad ha ka jylla, u Roka u la ong ba ki samla ha kane ka jylla kim shym la ïoh ïa ka rynsan kaba biang ban pyni ïa la ka sap ka phong ba ki don la ka long ha ka sports ne wat ka khaii ka pateng.

U la pyntip ba ka ABVP ka la buh thong ruh ban pynlong ïa ka jingïalangbah kaba ar sngi ïa kaba yn sa pyntip paidbah shen tad ynda la ïadonlang u State Organising Secretary.