Press "Enter" to skip to content

Buh thong ka sorkar ban pynjur ka jingpynmih dohkha da ka rukom ba thymmai

Shillong, Ïaiong 25 : Ka sorkar jylla lyngba ka tnad Fisheries ka buh thong ban pyntreikam noh da ka rukom kaba thymmai khnang ba kin lah ban pynmih khambun ki dohkha, kata lyngba ka jingïarap jong ki kor ki bor ka juk mynta.
Ïa kane la pynpaw da u Myntri katei ka tnad, Bah Comingone Ymbon haba kren kum u Kongsan ha ka jingkynduh lang jong ki nongri dohkha ba la tip kum ka State Level Fish Farmers’ Conclave 2019 kaba long ha kane ka sngi Palei ha ka nongbah.
Katkum ka jingong jong u, ïa ka Meghalaya State Aquaculture Mission 2.0 kaba dei ka bynta kaba thymmai jong ka Meghalaya State Aquaculture Mission la pyntreikam naduh ka 1tarik u Ïaiong mynta u snem bad hangne ki la don bun ki mishon kiba ïadei bad ki nongri dohkha ban ïarap ïa ki khnang ba kin lah ban pynmih khambun shuh shuh ki dohkha bad kumno ban ïoh ïa ki symbai dohkha kiba bha.
Na ka liang u Agricultural Production Commissioner, Fisheries, u KN Kumar u la ong ba kadei ka jingkynduh kadei ka sien kaba nyngkong ban pynpaw ïa ka jingïaroh ïa kito kiba la ïaid shakhmat ïaka kam ha kine ki hynriew snem ba la dep ha ka jingpynmih ïa ki dohkha kiba bha ha ka jylla.
U la ong ruh ba ki la sakhi ïa ka jingnang kiew arted ka jingpynmih dohkha ha kine ki snem, watla ka dang don ka jingduna kaba haduh 15,000 Metric Tonne na kaei kaba donkam kaba long haduh 27,000 MT.
La ïathuh ruh ba ki don mynta haduh kumba 22,000 ngut ki nongri dohkha ha ka jylla bad kumta lada thaw ïa ka Meghalaya Fish Farmers’ Association kan ïarap ïa ki ba kin pyni bad ai jingmut lang bad ruh halor ki lad ki lynti kiba ïadei bad ka rukom ri dohkha.
Ha katei ka sngi la donlang ruh ki riewshemphang, ki nongri dohkha, na ka bank bad kiwei kiwei. La ïoh ruh ïa ka jingkren na u P Sampat Kumar, Commissioner & Secretary, Fisheries, Secretary, Fisheries, I R Sangma bad Director, Fisheries, A L Mawlong.